Serchhip Hospital sak lai chawlhsan sa chhunzawm turin CM-in a chah

Serchhip District Hospital building thar tur sa mektute chuan hlauhthawn an neih avangin October 1, Thawhlehni khan October 2 aṭangin an sak chhunzawm rih loh tur thu an puang a; chief minister Lalduhoma, Serchhip bialtu MLA chuan hlauthawng loa sa chhunzawm turin a chah.

Thu dawn danin, Serchhip District Hospital sak thar tur hi cheng vbc. 86 chuang senna tur a ni a, sum ruahman zinga vbc. 21 chu Power Grid Corporation of India Ltd (PGCIL)-in an tum a; a satu chu Zamzo Construction & Consultancy an ni.

Damdawi-in sak dan tur ruahman (drawing) chu Chief Minister-in a pawm tawh a ni a, cheng vc. 21 petu PGCIL-in an pawm ve em tih Health department hotute an zâwt ṭhin a, mahse, tun thlengin chhànna an dawng lo. Hemi chungchangah hian hna an thawh thlawn loh nan sum petu PGCIL ngaihdan hriat phawt an duh avangin a sak hna chawlhsan rih an tum a, drawing chu PGCIL-in an pawm chuan sak chhunzawm leh mai an tum.

CM Lalduhoma chuan October 1 khan Serchhip District Hospitak sak hna thawh ṭan mek chu a tlawh a, damdawi-in chu drawing ang chuan cheng vbc 86 sênga sak tur a nih laiin, CM-in cheng vbc 71 senga sak tur a nih thu a sawi avangin drawing siamṭhat a, cheng vbc. 71 senna turin tihtêt leh hret a ṭul turah in satute chuan an ngai a ni.

CM Lalduhoma chuan nimin zing khan Serchhip PWD IB-ah Serchhip khawtlang hruaitute a kâwm a; District Hospital sak ṭan tawh chu thlamuang taka sa chhunzawm turin a satute a chah tih sawiin, "A ṭul chuan sum kan dap belh zel dawn," a ti.

Sorkar thuchhuah tarlan danin, Serchhip District Hospital sakna atan PGCIL-in cheng vbc. 21 an pek bakah, North East Special Infrastructure Development Scheme - other than road infrastructure (NESIDS OTRI) aṭangin cheng vbc 65 dah belh tum a ni a, mahse, NESIDS-OTRI guideline-ah damdawi-in atan cheng vbc 50 bak dah theih a nih loh avangin cheng vbc 50 dah a ni. Hei vang hian damdawi-in sak dan tur thlak hlek (change of scope) a ṭul a ni.

Chief Minister chuan, "PGCIL lam ngaichânga hun lo khawh ral a uiawm tawh avangin sum pek ṭul awm apiang hi NESIDS-OTRI aṭanga lo pek mai theih a ni a, contractor hian thlamuang takin hna lo chhunzawm se ka duh. A ṭul chuan sum kan dap belh zel dawn a ni," a ti. CM hian Health Minister pawh phone-a biain a chah nghal bawk niin sorkar thuchhuahin a tarlang.