Larsap hoin Swachhata Diwas hmang

UDPA leh PHE department chuan nimin khan Assembly Annexe conference hall-ah faina ni, Swachhata Diwas an hmang a, Governor Indra Sena Reddy Nallu-a'n hmanpuiin, Swachhata Diwas puala buatsaih Cultural Fest a hawn bakah, Faina Hapta puala intihsiakna lawmmante a sem.

Governor chuan, faina chu kawng tinrengah nunpui a ṭul thu leh khawtlang huapa kalpui a ṭul thu a sawi a, "Faina kawnga beihpui thlakna kum 10-na hmel hmuta Swach Bharat Mission hi kan zavaia ṭanrualna avanga hlawhtling a ni. Faina lama hmalaknain India rama hmeichhiate dinhmun, hriselna leh nunphung a chawi kâng nasa a, faina hi tun mai ni lo, kan ni tin nun leh tih dan phungah kan lak luh a ngai," a ti.

Mizote'n faina an nunpui nia a hriat thu sawiin Larsap chuan, "India ram hmun dangte tana entawn tlak nih tum zel ang che u. Prime Minister-in India ram chu kum 2047-ah ram changkang (developed India)-a hlang kai tura ṭan lak a nih tur thu a sawi tihlawhtling turin faina leh hrilselna hi peng pawimawh a ni," a ti a; India ramin bung thar a kai theih nan faina ngai pawimawh turin Mizo mipui a sáwm.

Chief secretary Dr Renu Sharma, State Steering Committee on Swachhata Hi Seva 2024 chairman pawhin thu sawiin, faina lama UDPA leh PHE department-a thawkte leh district tina hma latu DC kaihhruai district steering committee-te hmalakna chhuanawm a tih thu a sawi a; kumina faina beihpui thlak chhungin programme hrang hrang 500 vel buatsaih a nih thu leh mi 10,000 chuang an tel thu a tarlang.

Swachhata Diwas inkhawm hi PHE secretary F Liantluanga'n a kaihruai a, MLA Baryl Vanneihsangi leh sorkar department hotute an tel. UDPA joint secretary Zarzokimi kaihhruaiin Swachhata Diwas pual fai tura thutiam sawi rual a ni.

Kum 10 kal ta chhunga Mizorama Swachh Bharat Mission kalpui tawh dan tlangpui leh Swachhata Hi Seva 2024 hman dan video enho a ni a; Governor-in Swachhata Hi Seva 2024 hnuaia intihsiakna lawmman a sem bakah, street sweeper (safai mitra) thawk ṭhate hnenah chawimawina thilpek a hlan.

Swachhata Diwas pual hian Cultural fest buatsaih a ni a; waste to art sculpture leh street food stall-te siam a ni.