KHAWTHLIR

Thisen pe

UPC (NEI) ṭhalai, Pentecostal Youth Department, Siaha chuan PYD Week hman mek pualin nimin khan thisen pek an huaihawt a, Siaha District Hospital tan thisen unit 35 an pe a, petute mipa 32 leh hmeichhia pathum an ni. Siaha PYD-te hian Social Work Day an hmang nghal a, Siaha District Hospital leh a chhehvel an tifai a ni.

Lirthei chesualah thi

Nimin chhun dar 12:50 khan C Lalsiammawia (48) h/o Lalhmingliani, Maubawk, Aizawl chu lirtheiin a chesual a, chetsualna hmunah a thi. Thu dawn danin, C Lalsiammawia hian October 1, Thawhlehni khan Kolasib-ah Eeco van a lei a, a leinate'n Thawhlehni zanah an inah an dah a; niminah silfai tuma a tinung chu tlan thutin, an ṭhenawmte in chungah a tlân láwn a, an kawmthlang lamah a tla zui a ni.

EFCI ṭhutkhawm

Evangelical Free Church of India (EFCI)-a Ramthar lama rorelna sang ber, Central Ramthar Board chuan October 1-2, 2024 chhung khan Zemabawk Tlangvenga EFCI biak-inah ṭhutkhawm vawi 42-na an nei. Ṭhutkhawmah hian EFCI General Headquarters, presbytery leh mission field aṭangin palai 53 an tel a ni.

Hnahthialah Blood Donation Day

Association for Voluntary Blood Donation, Hnahthial Branch leh Hnahthial College-a Red Ribbon Club, NCC, NSS leh IQAC-te chuan October 1 khan Hnahthial College auditorium-ah National Voluntary Blood Donation Day an hmang a, blood bonation camp an buatsaih. He hun hi district bawrhsap Rita Lalnunmawii Pachuau-in a hmanpui a; mi 27-in Christian Hospital tan thisen an pe a ni.

Ruihhlo do sawiho

Mamit District Task Force on Ruihhlo Do chu October 1, Thawhlehni khan district bawrhsap Jacob Lalawmpuia kaihhruaiin a pisaah an ṭhukhawm a; ruihhlo donaa thawhho dan tur leh hmachhawpte an sawiho. Bawrhsap chuan, kohhran leh khawtlang hruaitute leh official-te'n thawhhona ṭha an neih a pawimawh thu a sawi a, "Theihtawpa ruihhlo do hi kan mawhphurhna a ni," a ti.