Faina Hapta khârna leh Faina Ni hman a ni

Nimin khan district hrang hrangah faina beihpui thlakna, Swachhata Hi Seva 2024 Campaign leh Mizoram Cleanliness Week khârna leh, Mahatma Gandhi pian champha puala 'Faina Ni' (Swachhata Diwas) hman a ni a; faina chunghanga intihsiakna hrang hrang lawmmante sem a ni. Swachhata Hi Seva hi September 17 aṭanga October 2, 2024 inkarah hman a ni.

Lungleiah chuan Convention Centre-ah hun hman a ni a, bawrhsap R Lalṭhazuala, District Steering Committee on Swachhata Hi Seva chairman-in a hmanpui. Bawrhsap chuan, bawlhhlawh thlahdah chu National Green Tribunal leh sorkar aṭanga pawisa chawi theihna, boruak tichhe thei leh mipui vantlang hriselna nghawng thei a nih thu a sawi a, faina tluantling a awm theih nan ṭang tlâng turin mipui a sawm.

Inkhawmah hian UDPA hnuaia faina lama thawktu mi 23 hnenah chawimawina thuziak hlan a ni a; Swachh Bharat Cultural Fest-a bawlhhlawh aṭanga thil ṭangkai siam chhuah (waste to art) pho chhuaktu self help group 15 zinga a ti ṭha zual pathum hnenah lawmman pek a ni. Zirlaite puala 'Faina ni tina nunpui (a ṭulna leh a pawimawhna)' tih thupui hmanga thu inziahsiak lawmman sem a ni bawk.

Siahaah chuan UDPA leh PHE department buatsaihin MADC Golden Jubilee Hall-ah Mizoram Cleanliness Week kharna leh Faina Ni hman a ni a; additional DC Abraham Beirazi Khithie-in hmanpuiin, faina hapta puala inelna lawmman a sem.

Siahaah hian Faina Hapta puala inelna hrang hrang lawmman sem a ni a; fai bera thlan ṭhenkhatte chu - vengah New Siaha East-I, office-ah PHE department office, biak-inah ECM New Siaha kohhran biak-in, restaurant-ah Sweet Corner, bazarah College Vaih Market-te thlan a ni.

Champhaiah chuan IPR Auditorium-ah bawrhsap VL Remliana hoin Swachhata Hi Seva leh Faina Hapta khârna hun hman a ni a; Khankawn Police check gate bula Rs 5,00,000 senga sak tur Aspirational Toilet lungphûm a phûm nghal.

Faina Hapta puala fainaa inelna lawmmante sem a ni a; fai bera thlante chu - vengah Hmunhmelṭha, sikulah Kanan Middle School, sorkar pisaah Treasury office, restaurant-ah Chawngthu Restaurant te a ni. Bawrhsap chuan, faina chu changkanna hmahruaitu a nih thu leh in chhungkhur aṭanga faina bul ṭan chu hmasawnna tur a nih thu a sawi.

Kolasib bawrhsap Robert C Lalhmangaiha kaihhruaiin DC conference hall-ah Swachhata Hi Seva kharna hun hman a ni. Bawrhsap chuan, "Swachhata Hi Seva programme a hlawhtlinna chu thawhhona vang a ni," a ti a, Swachhata Hi Seva chu khar ni mah se, faina lama harh tharna leh ṭan lak tharna hun atan hmang turin mi tin a chah.

Faina inelna lawmmante sem a ni a, faina atana hma latu mimal leh ṭhahnemngaite hnenah chawimawina hlan a ni. Kolasib district-a khaw fai bera thlan chu Saiphai niin, veng fai berah Kolasib College Veng thlan a ni a; high school leh a chung lamah fai intihsiaknaah School of Nursing, Thingdawl pakhatna niin, elementary-ah Thingdawl Middle School thlan a ni.

Inkhawmah hian PHE executive engineer Lalrosangi leh UDPA officer Josephine Zonunsangi ten Swachhata Hi Seva hnuaiah hmalakna hrang hrangte an sawifiah.

Serchhipah chuan DC conference hall-ah bawrhsap Paul L Khuma hoin Swachhata Hi Seva kharna hun hman a ni a; faina kawnga intihsiakna hrang hranga ti ṭhate hnenah lawmman sem a ni. Bawrhsap chuan, "Faina beihpui hi ni tin, kar tin, kumtluanin kan hmang tur a ni," a ti a, keimahni ṭheuhah faina bul ṭan turin mipui a chah.

Swachhata Hi Seva hman chhunga Serchhip khawpuia veng fai inelnaah Vengchung pakhatna an ni a; Best Performing VC (hma la ṭha leh hnatlang thawk chhuak tam)-a pakhatna chu Hmarveng VC an ni. PHE department buatsaihin Swachhata Hi Seva chhunga faina kawnga hma la ṭha ber atan Vanchengte thlan a ni a; Serchhip khawpui chhunga hmun bâl zual (blackspot) panga thlana blackspot tifai ṭha berah Chhiahtlang North VC thlan an ni bawk.

Lawngtlaiah chuan UDPA department bultumin DC conference hall-ah Cleanliness Week khârna inkhawm buatsaih a ni a, Lawngtlai East bialtu MLA Dr Lorrain Lalpekliana Chinzah-in a hmanpui. Hapta puala poem leh slogan inphuahsiak lawmman leh LADC hnuaia sanitation hna thawk ṭhate hnenah lawmman sem a ni.

Margaret J Vanalremmawii, DPO, UDPA chuan sawi danin, Swachhata Hi Seva hman chhungin Lawngtlaia veng hrang hrangah faina hnatlang neih a ni a, hmun parukah hoarding tar a ni. Lawngtlaia cleanliness target unit (bawlhhlawh a hmun ni loa paihna hmun) 15 tihfai a ni a, khaw 97-ah cleanliness target unit zawn chhuah niin, tihfai nghal vek a ni. Faina lam inzirtirna leh kawngzawh khaw hrang hrangah huaihawt a ni bawk.

Mamitah chuan Bazar Vengah Swachhata Hi Seva kharna leh Sampoornata Abhiyan Aspirational District programme hman kawp a ni a, Swachhata Hi Seva kalpui chhunga ti ṭhate hnenah lawmman sem a ni.

Khuallian Mamit bawrhsap Jacob Lalawmpuia chuan, "Hun tiam nei angin kal mah ila, faina kawnga kawng kan sah kuak tawh chhunzawmin, district fai ber ni reng thei turin mahni theihna zawn ṭheuhah hma i la chhunzawm ang u," a ti.

Saitualah chuan Swachhata Hi Seva kharna leh Swachh Bharat Mission kum 10 tlin lawmna UDPA leh PHE department bultumin Keifang Venghlui YMA Zawlbukah hman a ni a; bawrhsap Dr Lalngura Tlau-in a hmanpui. Bawrhsap chuan, Saitual district-ah khaw/VC 40 - thingtlangah VC 33 leh khawpui huam chhungahVC pasarih a awm thu a sawi.

Faina beihpui thlakna puala intihsiakna hrang hrang lawmman sem a ni a; khua/veng fai berah Ruallung thlan a ni a, Saitual Venglai leh Saitual-III ten an dawt. Hapta puala essay inziahsiakah Malsawmhlui, Class XII, Saitual HSS pakhatna a ni a, Waste to Art Competition-ah Ruthi Vansangpuii, Saitual PWD Veng pakhatna a ni.