Mizoram BJP-te'n Gandhi chibai an bûk

BJP, Mizoram Pradesh hruaitute chuan nimin khan Pachhunga University College chhunga Mahatma Gandhi limah a pian champha pualin zahna chibai an bûk a; Mizoram president Vanlalhmuaka chuan, Narendra Modi kaihhruaina hnuaiah India ram chu khawvela ram ṭhang duang ber zinga mi a nih thu a sawi.

Mizoram BJP President chuan, India ramin zalenna a neihna tura sûlsutu Mahatma Gandhi chu India hnampa tia sawi hial a nih thu a sawi a, "India ramin zalenna kan neih hnuah Pu Narendra Modi kaihhruaina hnuaiah India ram chu khawvela ram ṭhang chak leh ṭhang duang berte zingah kan awm tawh a, khawvelah pawh India chu zalen takin kan lêng mek a ni," a ti.

Vanlalhmuaka chuan, "Kan ram hi India hmarchhak ram leh India ramah ram ralmuang ber ni si, hmasawnna kawnga ke kan pên hlei thei lo hi a pawi hle a, mipui hian kan zalenna kan hman thiam ve a hun ta hle a ni," a ti a; India ramin kawng tinrenga hma a sawn angin Mizoram pawhin hma a sawn a ngaih thu a sawi.