Muthi leh E Lungdarah Special Gram Sabha

Sorkar laipuia Panchayati Raj Ministry ruahman, Peoples Plan Campaign for Gram Panchayat Development Plan (GPDP) 2025-2026 neih mek pualin nimin khan Muthi leh East Lungdar khuaah Special Gram Sabha neih a ni a; hemi puala Local Administration Department (LAD) minister C Lalsawivunga thusawi ngaihthlakho a ni.

Muthi khuaa Special Gram Sabha chu LAD secretary Teresy Vanlalhruaii'n a hmanpui a; tualchhung hmasawnna atana ruahmanna hrang hrang siam tura inzirtirna leh kum upate chawimawina hun atan hman a ni.

Teresy Vanlalhruaii chuan, khaw hmasawnna tur ngaihtuahnaah mipui kalkhawm rorelna a lal ber thu sawiin, "Khawtlang hmasawnna tur ruahmanna siamnaah naupang aṭanga puitling, hmeichhiate nen kan vaia kan tel a ṭul a, heng ruahmanna hi mi tin huap zo tur a ni," a ti a, LAD chu khaw mipui tan a inhawn reng thu a sawi.

Muthi-ah hian ka lkhawmte'n faina, ruihhlo leh hriselna chungchangah thuthiam an sawi rual a; ṭhalaite'n kum upate hmathlir tihhlawhtling tura intiamna thu an sawi bawk. Kum upa pahnih - Thangthuami (90) leh Lianchhunga ten thing ṭiak an phun a; kum 75 chung lam mi 25, mipa pakua leh hmeichhia 16 hnenah chawimawina thilpek hlan a ni.

East Lungdara GPDP Special Gram Sabha chu Thangburha Hall-ah buatsaih a ni a; a hawn nan C Rochungnunga (kum 85) leh Lalsiami (kum 93) ten thing an phun.

Inkhawmah hian SIRF-a thawkte'n GPDP leh gram sabha pawimawhna an sawifiah a, Village Poverty Reduction Plan chu pharh a ni. Kum upate chawimawina hun hman niin, khaw chanchin ngaihthlakho a ni a; faina, ruihhlo, hriselna leh kum upa zahna chungchangah thutiam an sawi rual bawk.