Serchhip ZPM-in MNF thil tih dem

ZPM, Serchhip Constituency Joint ZPM Block Committee (Serchhip leh Thenzawl) chuan thuchhuah siamin, chief minister Zoramthanga kaihhruai MNF sorkarin Anti-Defection Law hmanga ZPM MLA Lalduhoma an bei leh MLA a nihna aṭanga a bàn theihna tura MNF MLA-te'n an hêk chu an dem thu an tarlang.

Serchhip leh Thenzawla ZPM-te chuan, Lalduhoma laka MNF party thil tih dan leh dan an tlawh chhan ber Anti-Defection Law thil tum chu a inmil lo hle nia sawiin, "ZPM MLA-te kal chhoh tawh dan hi party hrang hrang MLA-te kal tawh dan tho, tu mahin sawisel leh khin ena an en ngai loh thil a nih avangin, a chauhthubarawh thil tih hle a ni. Pu Lalduhoma hian MLA ni tlak lo tur khawpin tih dik loh leh tih sual a nei lo," an ti.

MNF MLA-te thil tih dan chu Lalduhoma thlang tlingtu Serchhip bial mipui min zahlohna leh hmuhsitna a nih avangin, lungawithlak loh an tih thu an sawi a; Lalduhoma'n a bial mipui leh amah thlangtute a phatsan loh thu leh, Lalduhoma chu MLA aṭangin paih a ni a, Serchhip bialah by-election neih a ṭul ta a nih pawhin, a tlin leh ngei theih nan theihtawp an chhuah dawn thu an sawi bawk.