Rinpuii'n Karnataka sorkar hotute a kâwm

Social Welfare & Tribal Affairs minister Lalrinpuii chuan October 1, Thawhlehni khan Bengaluru-ah Karnataka deputy chief minister DK Shiva Kumar leh Karnataka Tribal Welfare secretary leh director-te a kâwm a, Mizoram nena thawhho dan turte a sawipui.

Sorkar thuchhuah tarlan danin, Lalrinpuii hian Karnataka Deputy CM hnenah hian Bengaluru-a Mizoram House sakna atana Mizoramin ram a neih dante sawiin, a sakna kawnga thawhho theih dan turte a sawipui a; DK Shiva Kumar chuan Chief Minister a sawipui tur thu leh theihtawpa thawhpui an inhuam thu a lo hrilh.

Thawhlehni vek khan Karnataka Tribal Welfare secretary Randeep D leh director Yogesh T-te pawh Lalrinpuii chuan a kâwm a, tribal cultural exchange programme neih theih dan tur a sawipui.

Nimin khan minister Lalrinpuii hoin Karnataka Tribal Affairs Director leh a team-te bakah, Bangalore Mizo Association hruaitute'n Mizoram House sakna tur ram an en a ni.