NSS din champha lawm a ni

Nimin, September 24 kha National Service Scheme (NSS) Day vawi 51-na a ni a, Aijal Club-ah lawmna inkhawm buatsaih niin, Sports & Youth Services minister Robert Romawia'n a hmanpui a, NSS volunteer-te'n khawtlang leh ram tan thil ṭha tak tak an tih ṭhin thu a sawi.

Robert Romawia Royte chuan, NSS volunteer-te'n thing phun, thisen pek, hnuchham in tlawh, vantlang tan inzirtirna hrang hrang buatsaih, kawngpui leh vantlang hmun pawimawh tihfai hnate an thawk ṭhin chu lawmawm a tih thu a sawi a; faina chungchangah mi dangte zirtirtu ni turin a fuih.

SYS Minister chuan, NSS volunteer-te chu a thlàwna thisen pekah hma hruaitu an nih thu sawiin, "Kum hnih chhung a záwna Mizorama páwl hrang hrang zinga thisen a thlàwna pe hnem ber in ni hi a lawmawm hle. Hma hruaitu ni chhunzawm zel turin duhsakna ka hlan che u a ni," a ti.

Robert Romawia hian Sports Minister’s Trophy for Voluntary Blood Donation dawngtute leh state level-a NSS Award for 2019-2020 dawngtute hnenah chawimawina a hlan nghal a ni. NSS Day lawmnaah hian Aizawla NSS unit 30 vel aṭangin NSS programme officer 50 vel an tel a, Covid-19 leng vangin NSS volunteer-te erawh an tel thei lo.

NSS hi September 24, 1969 (Mahatma Gandhi pian champha vawi 100-na)-ah din a ni a; a din tirhah chuan university leh state thlan bikahte chauh hawn niin, zirlai tel zat (enrolment) pawh 40,000 chauh a ni. University leh state hrang hranga zirna-inah hawn belh zel a ni a, tunah chuan NSS enrolment chu India ram pumah nuai 40 a tling tawh.

Mizoramah chuan NSS hi kum 1972 khan Pachhunga University College-ah NSS din a ni a, a hnuah college dangahte din zui a ni. Kum 1996 aṭangin higher secondary school-ah NSS din ṭan a ni bawk. Mizoram pumah college leh sikul 90-ah NSS unit a awm mek a ni.