Council of Minister-in Krismas thilpekah sorkar hnathawkte DA tihpun a remti

Council of Minister chu nimin khan chief minister Lalduhoma hoin Chief Minister's Office-a Cabinet room-ah an ṭhukhawm a; Krismas thilpek atan sorkar hnathawkte dearness allowance (DA) tihpun an remti.

Council of Minister chuan Finance department aṭanga agenda lut, 'Payment of Dearness Allowances to government employees at 4%' tih chu an sawiho hnuah an pawm a ni. Hei hi sorkar hnathawk DA 4%-a tihpunna tur a ni a; sorkar hnathawkte hnena Krismas thilpek atan November 2024 aṭangin hman ṭan a ni ang.

'Payment of Dearness Allowances to Government employees without the Approval of the Council of Minister and Revocation of Notification' pawh pawm a ni a, hei hi Council of Minister thutlukna hmasa anga kalpui tur niin, a kaihhnawih department-te chu lo siamṭha tura tih an ni.

Council of Minister meeting chuan 'Proposal for establishment of Mizoram State Human Rights Commission and proposal for creation of 16 posts' an pawm bawk a; hei hi Mizoram State Human Rights Commission dinna tur leh thawktu mi 16 lakna tur a ni. Gauhati High Court chuan September 6, 2024 khan thupek (order) chhuahin, order chhuah aṭanga thla 2 chhunga State Human Rights Commission din turin Mizoram sorkar a lo hriattir tawh a ni.

'Proposal for Amendment of The Mizoram Right to Information Rules, 2010' pawm a ni a; hei hi BPL chhungkuaa mite'n RTI Act tlawhchhana zawhna an zawha a man âwlna tur a ni a, BPL chhungkuaa mite tan zawhna zawh man pek a ngai tawh dawn lo.

Meeting chuan 'Proposal for Appointment of Advance Metering Infrastructure Service Provider (AMISP) for Imple-mentation of Smart Metering Under RDSS' an pawm bawk.