Hâlpuah hâltu man nghal theih lohte a hnuah police-in an bawhzui dawn

Inspector General of Police (IGP) Lalbiakthanga Khiangte chuan, kumin hunpui laia hâlpuah leh a kaihhnawih thilte sorkarin a khap chu chak takin an bawhzui dawn a, December 31 zanah hâlpuah hâltute man nghal thei lo mah se, hâlpuah hâlna hmun leh hâltu finfiahna ṭha a awm chuan a hnu lamah an bawh­zui dawn thu a sawi.

IGP Lalbiakthanga Khiangte hian nimin khan DGP conference hall-ah press mite thingpui a inpui a; sorkarin halpuah, halmawi leh a kaihhnawih thilte a khap chungchanga police-in hma an lak dan tur ṭhenkhat sawiin, press mite ṭawiawmna a ngen a ni.

Zawhna chhángin IGP chuan, halpuah/halmawi khapna a hlawhtlin theih nan Aizawl bikah chuan police station tinah team eng emaw zat an siam dawn a, uluk takin khawpui chhung an vil dawn thu leh, Mizoramah halpuah lak luh a nih loh nan Mizoram luhkaa checkgate tinah khauh lehzuala hmalak a nih dawn thu a sawi.

IGP chuan zawhna chhangin, kumhlui thlah zana halpuah hâltu zinga tam tak chu police tana kalpawh theih loh tura an inkalhkhum ṭhin thu a sawi a, "Zana man nghal theih an nih loh pawhin, video evidence kan neihte chu in neitu leh address-te kan chhinchhiah ang a, a tûk lamah case kan register ang a, kan bawhzui dawn," a ti.

Lalbiakthanga Khiangte chuan, halpuah leh a kaihhnawih thilte hâl chu inkhapbeh vek theih a ni lo tih sawiin, khapna hlawhtlinna tura pawimawh zawk chu a ṭhat lohzia mipui thinlunga tuh a nih thu a sawi a; mipui hnena zirtirna pek kawngah theihtawp chhuahpui turin thuthar thehdarhtute a sáwm.

Kum 2009 hunpuiah hlawhtling takin halpuah khap a ni tih sawiin Lalbiakthanga chuan, "Kum 2012 thlengin a hlawhtling em em a; a chhan lian tak pakhat chu media a ni. Media in ṭan phawt chuan tunah pawh hian a hlawhtling leh ngei ang ka ring," a ti.