SHC inthlan hun tur Nov. 5, 2024

State election commissioner (SEC) Dr H Lalthlangliana chuan nimin khan a pisaah thuthar thehdarhtute a kâwm a; Sinlung Hills Council (SHC) Inthlanpui 2024 chu November 5, 2024-ah neih tur a nih thu leh SHC huam chhungah Model Code of Conduct (MCC) hman ṭan nghal a nih thu a puang.

SHC inthlanpui atana hun bithliah dan chu, October 10, 2024 chawhnu dar 3 thleng chuh tumte tan hming pek luh theih a ni a, October 10 chawhnu dar 3 hnuah candidate-te nomination paper endik tur a ni. October 14, chawhnu dar 3 thleng inhnuhdawh theih a ni ang a, hemi ni chawhnu dar 3 hnuah candidate-te symbol târ chhuah a ni ang.

November 5, 2024-ah zing dar 7 aṭanga tlai dar 4 thleng vote thlak hun hawn a ni dawn a, vote tlate chu polling station awmna district headquarters ṭheuh an thlen veleh chhiar nghal tur a ni. Inthlan ṭhat leh vote thlak ṭhat ngai a awm chuan November 6, 2024-ah inthlan ṭhat tur a ni a, SHC inthlan kaihhnawih thil zawng zawng hi November 8, 2024-ah zawh vek tura ruahman a ni.

Vote thlakna hmanrua atan The Mizoram (Election to Sinlung Hills Council) Rules, 2019 Rules 50, 51 & 52-in a sawi angin ballot box leh ballot paper hman a ni dawn.

SHC-ah hian constituency 12 leh polling station 38 a awm a; constituency 12 zinga paruk chu Aizawl district chhunga awm niin, PS 19 a awm. Saitual district-a constituency pali awmin, PS 12 a awm a, Kolasib district-ah constituency pahnihah awmin, PS pasarih a awm. A ṭul dan azirin voter tamna bik polling station-ah auxilliary polling station hawn belh a ni ang.

Bial 12-ah hian voter 23,789 an awm a, mipa 11,875 leh hmeichhia 11,914 an ni. Voter tamna ber Sakawrdai North constituency-ah 2,672 an awm a, voter tlem berna New Vervek constituency-ah 1,205 an awm.

Venhimna khauh lehzuala kalpui ngai, critical polling station 16 a awm a, Aizawl district-ah paruk, Kolasib district-ah pasarih leh Saitual district-ah pathum a ni. Critical PS-ahte hian District Magistrate leh SP-te'n inthlanna him leh muanawm neiha nih theih nan ruahmanna an siam ang.

SEC chuan, SHC-ah inthlanna felfai leh muanawm tak a awm theih nan inthlan buaipuitu official te, political party te, media, tlawmngai pawlte leh SHC chhunga mipuite ṭawiawmna a ngen a; SHC-a vote neite chu vote thlak ṭheuh turin a sáwm bawk.

SHC inthlan leh a kaihhnawih thilah thil thleng danglam bik leh Model Code of Conduct bawhchhiatna a awm chuan chhinchhiah a, thla la zel turin SEC chuan district election officer-te a chah a ni.