Ni 3 chhungin Assam lirthei 109 endik

Mizoram Commercial Vehicles Union (MCVU) chuan October 1-3, 2024 chhung khan Bualpuia check point an siamah Assam aṭanga mimal lirthei (car), khualzin (passenger) phur an awm leh awm loh an endik a; lirthei 109 an endik a, chu'ng zinga lirthei pathum lakah action lak a ni.

MCVU hian Bualpui khelmual bula check point siama lirthei an endik ṭan ni, October 1 khan Assam-Mizoram pana tlan lirthei 23 leh Mizoram-Assam pana tlân 26 (a vaiin 49) an endik a, October 2-ah Assam-Mizoram pan 28 leh Mizoram-Assam 25, a vaiin lirthei 53 an endik. Nimin khan Assam-Mizoram pan pathum leh Mizoram-Assam pan pali, a vaiin lirthei pasarih an endik bawk.

Ni thum chhungin MCVU duty-te chuan Assam lam aṭanga Mizoram pan lirthei 54 leh Mizoram aṭanga Assam pan lirthei 55 an endik a, a vaiin lirthei 109 a ni. Lirthei an endikte chu private car leh Assam local taxi, inter-state permit nei lote an ni a; lirthei pathum lakah action lak a ni.

MCVU hruaitute chuan, Assam aṭangin private car rawn lut zingah dan anga chhiah chawi si loa passenger phur an awm ṭhin tih hriat a nih thu sawiin, "Phalna nei loa state boundary paltlanga passenger phura an rawn service hi a ngaimawhawm a, sum tam tak senga tourist petmit neite tan chuan mit a kham lo thei lo. CYMA-te nen kan inkawm aṭangin private car-te hi ruihhlo tawlhah rinhlelh an kai thu kan hre bawk a, YMA branch ṭhenkhat aṭangin Assam private car-te aṭanga ruihhlo no. 4 an man fo thute kan hre bawk," an ti.

Private car, passenger phura tlan ṭhinte ngaihven tura ruat an nih angin MCVU chuan chawlhkar khat chhungin private car 519 an chhinchhiah thu sawiin MCVU hruaitute chuan, "List mumal tak leh an motor thlalak ṭhenkhat nen CM hnenah kan thlen a, CM-in a lo ngai pawimawh hle," an ti a; Home Minister nen an sawiho leh hnuah check point siamin hma an la zui ta tih an sawi.

MCVU hotute sawi danin, check point siama lirthei an endik hi Kolasib district-a sorkar thuneitute phalna leh hriatpuinaa tih a ni a; ni thum chhung hrui pawta endik phalna pek niin, nimin khan an hun a tawp avangin lirthei endik chu an titawp. Ni thum chhung hian englai pawhin (24×7) duty an indah a ni.

Assam lam private car, passenger phurte chu passenger la tawh lo tura hrilhin, an thil tih dan chu dan phal loh a nih dan an hrilhfiah a; harsatna dang siamsak loin an kaltlangtir ṭhin. Lirthei pathum erawh chu MCVU thu zawm loa an tih nawn leh avangin action lak a ni.