Tualthattua puh kum 7 hnuah man

Kum 2017 March thlaa Falkland Veng, Aizawla mi pakhat thattua puh Manik Das @ Manoj (44) leh a nupui Anjali Devi (40), Aamdhari, Dumka district, Jharkhand-te chu tun hnai khan Mizoram Police hnenah hlan an ni a, October 2, Nilaini khan Aizawl thlenpui an ni.

Kum 7 chuang kal ta, 2017-a Falkland Venga tualthahna thlenga mawhphurtua puhte man chungchang hi IGP Lalbiakthanga Khiangte chuan nimin khan DGP Conference Hall-ah thuthar thehdarhtute a hrilhfiah a ni.

IGP Lalbiakthanga Khiangte-in a tarlan danin, Falkland Venga Hebrai Veng an tiha Zairema in hnuaiah Mangra ruang phûm hmuh chhuah a nih thu Falkland Veng YMA hruaitute hnen aṭangin March 25, 2017 khan Bawngkawn Police Station-in an dawng a, an bawhzui nghal a ni. Ruang chu endik a ni a, Mangra chu thah a niin a lang a, March 17, 2017-a thah a nia hriat a ni. Ruang hmuh a nih hian Manik Das te chhungkua chu an tlanbo tawh.

Mizoram Police-in an chhui zuina aṭangin Manik Das (Manoj tia koh) s/o Kisto Das leh a nupui Anjali Devi te chu Jharkhand-a Kanthikund police-te'n tualthahna pahnih kaihhnawihah March 26, 2017-ah an man tih hriat a ni. Mizoram Police chuan magistrate-ah Manik Das te nupa lak phalna November 20, 2019-ah an dawng a, tualthattua puhte la turin Jharkhand an pan zui a; mahse, Assam-ah Citizens Amendment Bill vanga lungawi lohna nasa tak a awm avangin Jharkhand an thleng thei lo a, Covid-19 léng avangin harsatna an tâwk bawk.

Aizawl SP Rahul Alwal ruahmannain September 26, 2024 khan Bawngkawn PS-a inspector Maria Biakchungnungi kaih­hruai team din a ni a, Manik Das te nupa la turin Jharkhand an pan zui a ni. Dumka district-a Shikaripara Police Station officer in-charge Hari Prasad Shah leh a thawhpuite puihnain September 29 khan Manik Das leh Anjali te chu an la a, October 2 khan Bawngkawn PS an thlenpui ta a ni.

Lalbiakthanga Khiangte chuan, Manik Das te nupa hian Falkland Vengah in an luah a, fate pawh an neih thu a sawi bakah, an thah tak Mangra chu an ina riak ve ṭhin a nih thu a sawi a; Mizoram Police-in an man theih nan Dumka SP Pitambar Singh Kherwar leh a thawhpuite'n Mizoram police-te an puih nasat thu a sawi bawk.