Larsapin FCSCA, FCI leh IOC hotute kâwm

Governor Indra Sena Reddy Nallu chuan nimin khan Raj Bhavan-ah Food, Civil Supplies & Consumers Affairs (FCSCA), Food Corporation of India (FCI) leh Indian Oil Corporation (IOC) hotute a kâwm a; an harsatnate sukiang turin theihtawp chhuaha hmalakpui a inhuam thu a hrilh.

Governor hian FCSCA, FCI leh IOC hotute chu tuialhthei, eirawngbawlna gas leh buhfaia Mizoram dinhmun te, Mualkhang Gas Bottling Plant leh Mizorama kudam dinhmun te, thla khata eirawngbawlna gas mamawh zat leh dawn dante a zawt a ni.

Mipuiin tuialhthei, eirawngbawlna gas leh buhfaiah harsatna an tawh loh nan ṭang mar pat reng tura chahin Larsap chuan, "Harsatna in neih chuan ka hnenah thlen hreh lo u la, sorkar laipui lama in hotute hnenah pawh in harsatnate thlensak a, harsatnate sukiang tura theitawp chhuaha hmalakpui cheu ka inpeih reng a ni," a ti.

Inkawmnaa tarlan danin, FCI kudamah buhfai metric ton 13,000 leh FCSCA kudamah metric ton 8,659.33 a awm mek a, October quota sem a ni tawh. November qouta chu kar lehah sem leh a ni tur thu FCSCA hotute chuan Governor an hrilh.