EMRS zirlaite intihsiakna ṭan a ni

Mizorama Ekalavya Model Residential School (EMRS) sikulte hnam làm leh zai, thu leh hla leh mimal thiam thil hmanga an intihsiakna inkhawmpui, '3rd EMRS Mizoram State Level Cultural & Literary Fest & Kala Utsav 2024' chu nimin khan EMRS, Lungleiah ṭan a ni a, Lunglei High Powered Committee (HPC) vice chairman V Malsawmtluanga, MLA-in a hawng.

EMRS Cultural & Literary Fest & Kala Utsav hi ni hnih awh tur a ni a; ram leh hnam inunauna leh inpumkhatna atan te, hnam ziaráng humhalhna leh chawi nunna atante leh, zirna piah lama zirlaite mimal thiamthil hai chhuah leh tihpunna atantea ruahman a ni. India rama EMRS-te chu hnam lâm leh zai, thu leh hla leh mimal thiamthil hmangtein an inel ṭhin.

Cultural & Literary Fest & Kala Utsav-ah hian Mizorama EMRS 11 - Lunglei, Serchhip, Chawngte, Lawngtlai, Ngopa, Tuipang, Bilkhawthlir, Niawhtlang, Tlangnuam, Tlungvel leh Zawlnuam aṭangin sikul tin ai awh zirlai 20 leh anmahni hruaitu zirtirtu pahnih ṭheuh an fuan khawm a; ni hnih chhungin inelna chi hrang 24 hmangin an intihsiak dawn a ni. Inelna mala pakhatna aṭanga pathumnate chu October chawlhkar thumnaa national level intihsiaknah Mizorama EMRS-te aiawhin an tel ang.

V Malsawmtluanga chuan, lehkhabu chhung thu zirna ngawr ngawr piah lama zirlaite'n rilru, taksa leh thiamthil lama hriselna leh hmasawnna an neih theihna tura EMRS-in inelna thianghlim an buatsaih ṭhin chu hlu a tih thu a sawi a; chhunzawm zel a, hmasawnpui zel turin zirlaite leh zirtirtute duhsakna a hlan.