Governor-in Tuiriala SWMC a tlawh; Ni tin bawlhhlawh ton 119.42 vel paih a ni

Governor Indra Sena Reddy Nallu chuan October 2, Nilaini khan bawlhhlawh sawngbawlna, Solid Waste Management Centre (SWMC), Tuirial a tlawh. SWMC aṭang hian ni tin bawlhhlawh ṭawi thei (dry waste) ton 7.98 vel hman nawn leh theih tura sawngbawl turin scrap dealer 11 hnenah an hralh ṭhin thu AMC hotute'n an tarlang.

AMC tarlan danin, SWMC-ah hian Aizawl khawpuia bawlhhlawhte kar tluanin Pathianni tih loh zawngah phurh luha sawngbawl ṭhin a ni a, thawktu mi 35 an awm. Ni tin bawlhhlawh paih truck 190 velin bawlhhlawh ton 119.42 vel an chhûng khawm ṭhin a, chung zinga ton 89.09 chu ṭawih thei (wet waste) a ni a, a dang ton 30.33 chu ṭawih thei lo (dry waste) a ni.

Bawlhhlawh ṭawih thei lo zinga ton 7.98 vel chu hman nawn (recycle) leh theih turin ni tin AMC pawmpui scrap dealer 11 hnenah hralh ṭhin a ni a; ṭawih theite chu mechanical compost plant hmangin kumin March thla aṭang khan leiṭhaah siam zel a ni thung.

Indra Sena Reddy Nallu chuan, khawpui ṭhang zelah bawlhhlawh a pun chak avangin a nih dan tur ang taka bawlhhlawh sâwngbawl a ṭul thu a sawi a, "Hmasawnna ruhrel lian leh pawimawh tak takte enkawl zui leh tuaihnûm kawngah ṭan rual a ṭul a, harsatna a awm a nih pawhin kan zavaia kan ngaihven tlân a ṭul a ni," a ti.

Governor hian SWMC-a mechanical compost plant, vermi compost plant, waste resource center, waste incinerator, common bio medical waste treatment plant leh temporary holding area-te a en a; department hotute a kâwm bawk.

Governor hi Aizawl bawrhsap Lalhriatpuia, AMC commissioner Joseph H Lalramsanga leh jonit commissioner Lalremruata Kullai, Aizawl Smart City deputy CEO V Lalruatliana leh sorkar hotu dangte'n an ṭawiawm a ni.

Tuiriala SWMC hi State Investment Programme Management and Implementation Unit (SIPMIU)-in North East Capital Cities Development Implementation Programme (NERCCDIP) hmanga an siam a ni a, kum 2019 khan hawn niin, kum 2022 khan AMC hnenah an hlan a ni.