Champhaiah Hnahsin Kût ṭan a ni

Champhai Nature Conservancy kaihhruaina hnuaia pawl hrang hrang thawkhote'n an buatsaih Hnahsin Kût chu nimin khan Aui Graden, Champhai phai pheiah ṭan a ni a, adviser to chief minister TBC Lalvenchhunga'n a hawng.

Adviser to CM hian Hnahsin Kût zara mipuite'n eizawnna remchang an neih belh chu lawmawm a tih thu a sawi a, "Champhai hi Mizoram buhzem ‘Rice Bowl of Mizoram’ tia chhâl ṭhin a ni a, buhfai kher ni lo, tourism kaltlanga Mizoram buh zêm a nih theih ka beisei," a ti.

Kût hawn inkhawmah hian Champhai North bialtu MLA H Ginzalala leh Champhai South bialtu MLA Lt.Col. Clement Lalhmingthanga te pawhin thu a sawi.

Hnahsin Kût hi vawiin leh naktukah chhunzawm a ni dawn a, October 18-ah kharna hun hman a ni ang. Kût chhungin adventure sport, concert, fashion show leh stall hrang hrang chhim tur a awm dawn.

Information & Public Relations department leh Hnahsin Kût Organising Committee ṭangkawp chuan nimin khan Champhaia IPR Auditorium-ah Champhai district-a high school, HSS leh college zirlaite pualin Hnahsin Kût Painting Competition an buatsaih a, Aui Garden-ah Photo Exhibition an buatsaih bawk. Intihsiakna hi Champhaia IPRO Lalchhuawma Ralte-in a hmanpui a ni.