Champhai leh Kolasibah National Wildlife Week

Champhai leh Kolasib-ah nimin khan National Wildlife Week vawi 70-na hawn a ni a; zirlaite, khawtlang hruaitute leh tlawmngai pawl hruaitute pualin nungcha leh ramngaw humhalh pawimawhna inzirtir a ni.

Champhaiah chuan EFCC Champhai Forest Division leh Champhai College Eco-Club ṭangkawpin Champhai College Multipurpose Hall-ah National Wildlife Week an hmang a, wildlife conservation awareness campaign neih a ni.

Champhai DFO Lalbiakchama Chawngthu-in Wildlife Protection Act, 1972 leh Mizorama ramngaw awm dan leh chereu dante a sawifiah a; zirlaite leh EFCC department-a thawkte bakah Champhai Sub Hrqs YMA, Champhai Sub Hqrs MHIP leh khaw hrang hranga Village Forest Development Committee member-te an tel.

Kolasib-ah chuan EFCC Kolasib Forest Division buatsaihin Kolasib Venglaia St Joseph's Parish Hall-ah National Wildlife Week hman a ni a; nungcha leh ramngaw thlalak chi hrang hrang mipui hmuh theih tura pho chhuah a ni.

Kolasib ACF Thanliana Hauhnar leh Kolasib College-a associate professor Christopher JZ Lawlor, Kolasib district Honorary Wildlife Warden ni bawkten ramngaw leh nungcha humhalh pawimawhna hrang hrang an sawifiah a; St John's HSS leh C Zakhuma HSS zirlai leh zirtirtute telin, zirlaite hi National Wildlife Week pual hian extempore speech hmangin an intihsiak nghal a ni.