KHAWTHLIR

Governor-in tlawh

Governor Indra Sena Reddy Nallu chuan nimin khan Sairanga rêl chawlhhmun sak mek leh Mualkhang-Sairang inkara lei (bridge no.196) dawh mek a tlawh. Northeast Frontier Railway engineer-te chuan July 2025 ral hmain Sairang rêl chawlhhmun leh Sairanga lei dawh chu zawh hman an inbeisei thu an lo hrilh. Sairang rêl chawlhhmunah hian rêl kawng (track) 13 a awm dawn a, passenger track pathum leh non-passenger track 10 a ni ang.

Chhandamna Kohhran kum 10-na

Chhandamna Kohhran (Salvation Church of India) chuan October 2, Nilaini khan LPS Arena-ah an kohhran kum 10 tlin lawmna leh Pathian hnena lawmthu sawina inkhawm an buatsaih a, tin jubilee mei an dêt bakah, jubillee dár an vua. Chhandamna Kohhran hi October 2, 2014-ah din a ni a, kum 10 tlin hriatrengna lungphun chu an kohhran president Upa H Lianzela'n a hawng. Chhandamna Kohhran hian Chaltlang Lily Vengah hmunpui an nei a, Mizoramah tualchhung kohhran 21 an nei mek a ni.

Lawmthu sawina Minister-in hlan

Food, Civil Supplies & Consumer Affairs (FCSCA) minister B Lalchhanzova chuan Mizoramin ei leh bar a lak luhna kawnga Bairabi khawtlang inpeknate fakawm a tih avangin nimin khan a pisaah YMA, Bairabi North Branch hnenah lawmthu sawina thilpek atan ṭhutthleng 120 a hlan. FCSCA Minister hian Bairabi North YMA hnenah hian a hmain infiamna bungrua leh trolly 15 a lo hlan tawh a ni.

QCAB hmang dawn

Mizoram Public Service Commission chuan Mizoram Civil Services (Combined Competitive) Main Examination, 2024 aṭang hian Question-cum-Answer Booklet (QCAB) an hmang ṭan dawn a, negative marking a awm dawn lo tih an tarlang. QCAB sample chu MPSC website-ah en theih a nih thu tarlangin, instruction chhiar uluk tur leh fimkhur taka zawhna chhang turin exam turte an chah a ni.

MZU-in thisen pe

Mizoram University NSS chuan nimin khan MZU Multipurpose Hall-ah thisen pek an huaihawt a, Civil Hospital, Aizawl tan thisen unit 112 an pe a, petute mipa 80 leh hmeichhia 32 an ni.