Inrêlbàwlnaa sang tak tak chelh tur Mizo an awm meuh tawh lo - Sapdanga : Mizoramin all India service post 70 a nei

Department of Personnel & Administrative Reforms (DPAR) minister K Sapdanga chuan, Mizoram sorkarin all India service sanctioned post 70 a nei mek a, chu'ng zinga 32 chu IAS post a nih thu sawiin, Mizoram inrêlbàwlnaa a fawng pawimawh leh sang tak tak chelh tur Mizo an awm meuh tawh loh thu a sawi.

Zoram Research Foundation (ZRF), Mizoram IAS Association leh The Aijal Club-te'n nimin khan Aijal Club-a 'All India Services Seperate Cadre for Mizoram' (Mizoram tana cadre hran neih) chungchang zirhona an buatsaih a, minister K Sapdanga hian hmanpuiin thu a sawi a ni.

DPAR Minister chuan, Mizoramin all India service post 70 a neih mek thu sawiin, "Tun dinhmunah Mizoramin all India service sanction post IAS 32, IPS 19 leh IFS 19 a nei mek a, sorkar laipuiin IAS leh IPS paruk ve ve a rawn dah thar. All India services-ah Mizo inziak tling kan tlem zel hi a veiawm hle a, Mizoram inrêlbàwlna kawnga sorkar fawng pawimawh leh sang tak tak chelh tur Mizo kan nei meuh ta lo hi ṭan lak thar nan hman ni se ka duh," a ti.

All India service officer-te Mizoram state sorkar hnuaia a pumhlûma an awm theihna tura Mizoram state bil tana cadre hran neih chu thil pawimawh tak nia a hriat thu sawiin K Sapdanga chuan, "Service hun pumpui state danga insawn kual reng loa hmun khata hman hian hnathawh kawngah rah ṭha a chhuah thei dawn a ni," a ti a; cadre review-te pawh ngaihtuah tel a pawimawh thu sawiin, Mizoram hmakhua ngaia mithiamte'n Mizoram tana all India service cadre hranpa chungchang sawihona an buatsaih chu lawmawm a tih thu a sawi bawk.

Zirhona hi ZRF general secre-tary Rochamliana'n a kaihruai a; Mizoram IAS Association president PC Lawmkunga leh member C Ropianga ten thu an sawi a, sawihona hun hman a ni.

Sawihonaah Mizoramin all India service cadre hranpa a neih loh avanga sorkar inrêlbàwlnaa harsatna a tawh ṭhin te, cadre hranpa neih ṭhatna leh ṭhat lohna nia langte sawi a ni a; Mizoram puala cadre hranpa neih a hun tawh thu leh Cadre Review Committee ngaih pawimawh tel a ṭul thute sawi a ni bawk.

Mizoram hian all India service - Indian Administrative Service, Indian Police Service leh Indian Forest Service-ahte cadre hranpa a nei lo a; Arunachal Pradesh, Goa, Mizoram and Union Territory (AGMUT) cadre-ah a awm a ni.