Ruih theih thila fihlim turin sorkar hnathawkte chah

Sports & Youth Services minister Lalnghinglova Hmar chuan nimin khan Ramhlun Indoor Stadium-ah Mizoram Civil Services Sports & Cultural Association buatsaih 35th Annual Sports & Cultural Meet 2024-25 a hmanpui a; sorkar hnathawkte chu ruih theih thila fihlim turin a chah.

Lalnghinglova Hmar chuan, sorkar hnathawkte chu an hriselna ngai pawimawh tura chahin, "Ruih theih thil lakah fihlim u la, fitness lamah ṭan lain, zûk leh hmuam insûmna nen in nun vawng uluk ang che u. Kan ram a lo hrisel zual zel nan leh sport lamah national leh international level-ah kan lan phak ve theih nana bul ṭantu nih tum ang che u," a ti.

Infiammite'n tih tak zeta ṭan an lak a pawimawh thu sawiin Minister chuan, "Kan ramin sport kan tuipui leh kan buaipui ang hûin national leh international level-a lang phak kan la tlem hi a pawi. Olympic 2036-a kan tel ve theih nan tun hunah hian SYS department chuan thapui thawhin ṭan a la mek a ni," a ti a; Sports Meet-a tel sorkar hnathawkte chu an fate infiamna lam tuipui a, an ei leh in kawngah leh insumtheihna kawngah tun aṭanga fuih fo turin a chah.

Annual Sports & Cultural Meet hi October 1-4, 2024 chhunga neih a ni a, sorkar hnuaia thawk zawng zawngte inkara inunauna, inpawhna leh in ṭhian ṭhatna ṭha zawk a awm theih nana buatsaih a ni.

Meet-ah hian infiamna chi paruk bakah, kum danga la tih ngai loh Cheraw (Kântluang) leh Chheihlâm hmanga intihsiak a ni a; Mizoram sorkar hnuaia department 65-a thawk mi 1,800 vel an tel. A pumpuiah Police (un-armed) chu pakhatna an ni.