ZPM zawmtu LADC MDC pahnihin High Court-ah thiam an chang

Lai Autonomous District Council-a member of district council (MDC) pahnih - LR Dingliana Chinzah leh N Zangura te chu political party dang an zawm avanga LADC Chairman-in bàn a tumnaah High Gauhati Court-in thiam a chantir.

Thu dawn danin, LADC MDC pahnih - Lawngtlai AOC bialtu LR Dingliana Chinzah leh M Kawnpui bialtu N Zangura te hi LADC inthlanpuiah independent candidate niin, thlan tlin an ni a, June 20, 2024 khan MNF party aṭanga thlan tlin MDC pasarih nen ZPM party an zawm a ni.

ZPM an zawm avang hian LADC Chairman chuan ni ruk chhunga insawifiah turin July 12, 2024 khan LR Dingliana leh N Zangura te chu a hriattir a, MDC pahnihte hi Gauhati High Court, Aizawl Bench-ah an zualko ve nghal a ni. MDC pahnihte'n petition an thehluh chu Gauhati High Court chuan a ngaihtuah nghal a, an awm dan ngaia awm rih turin (MDC ni zel turin) a ti a ni.

Gauhati High Court chuan October 3, Ningani khan thutlukna (judgement & order) a tichhuak a; LR Dingliana Chinzah leh N Zangura te chu thiam a chantir a ni.

High Court chuan, LADC-in member paih theihna dan a neih chu an thuneihna piah lam a nih thu leh, MDC bàn tumna thubuai awm tawhahte pawh MDC bàn tumte'n thiam an lo chan tawh ṭhin thu a tarlang. A hmain MNF MDC K Hrekung chu ZPM a zawm avangin LADC Chairman-in MDC aṭanga bàn a lo tum tawh a, mahse, High Court-in Hrekung chu thiam a chantir tawh a ni.