Mipa naupang kum 10 mi pawngsualtu hnam dang kum 20 táng turin hrem

Kum 2023 July thlaa Kolasib district-a mipa naupang kum 10 mi páwngsualtu Asgat Ali (22) s/o Akash Ali, Lakhipur, Cachar district, Assam chu Kolasib District Court chuan kum 20 chhung táng turin a chungthu a rêl.

Kolasib aṭanga thu dawn danin, Asgat Ali hi Assam aṭangin Mizoramah cement mistiri hna thawk tura rawn lut a ni a, July 22, 2023 thimhlim khan an riahna camp bul hnaia mipa naupang kum 10 mi leh a ṭhianpa khawlai lêngte chu a man bet a; naupang pakhat zawk a tlanchhiat theih laiin, pakhat zawk chu a kekawr hlîpin a pawngsual a ni.

Thil thleng chungchangah hian July 26, 2023 khan Vairengte Police Station-ah FIR thehluh a ni a, police-te'n Asgat Ali chu an man nghal a, POCSO Act Section 6 tlawhchhanin thubuai an ziak lut. Mipa naupang chu doctor-in an endik a ni.

Asgat Ali thubuaiah hian Kolasib District Fast Track Court-a judge R Vanlalena'n nimin khan judgement & order a tichhuak a; mipa naupang pawngsualtu hi kum 20 chhung jail-a táng tur leh Rs 5,000 chawi turin a hrem a, pawisa a chawi loh chuan thla thum dang tàn belh turin a ti bawk.

Asgat Ali hian Mizo ṭawng a thiam lo a, Bengali leh Hindi chiah a thiam. A chungthu rêl a nih chhhungin Kolasib District Jail-ah a táng a ni.