Supply Minister leh Northeast Frontier Railway hotu inkâwm

Food, Civil Supplies and Consumers Affair (FCSCA) minister B Lalchhanzova chuan nimin khan Guwahati-ah Northeast Frontier Railway general manager Chetan Kumar Shrivastava a kâwm a; kumina Sairang thleng rel luhtir tum chu Kawnpui rêl chawlhhmuna leimin vangin nakkum kum laihâwl vel tinzawn a ngaih thu Shrivastava chuan a sawi.

Supply minister B Lalchhanzova hian September 27, 2024-a Jamira rel chawlhhmun (Hailakandi district) bula tuilianin rel kawng (railway track) a tihchhiat chu a hmuna a tlawh thu leh a hmuna thuneitute nen rel kawng siamṭhat thuai dan tur an sawiho thu Chetan Kumar Shrivastava a hrilh a; rel kawng chhia chu siamṭhat thuai a nih theih nan theihtawp chhuaha hmanhmawhpui turin a ngen.

Chetan Kumar Shrivastava chuan, rel kawng chu Mizoram châk lak luhna pawimawh a nih dan an hriat thu te, rel a tlan chhunzawm vat theih nan hna thawh mek chu an vil reng thu te, ruahsur vangin an tum anga chaka hma an lak theih loh thu leh pawi a tih thu te, October 2024 chhunga zawh hman an tum thute a sawi a ni.