KHAWTHLIR

MZU-in thisen pe

Mizoram University NSS chuan nimin khan MZU Multipurpose Hall-ah blood donation camp an huaihawt a, Civil Hospital, Aizawl tan thisen unit 118 an pe a, petute mipa 95 leh hmeichhia 23 an ni. MZU hian October 2 khan thisen unit 112 an lo pe tawh bawk a, ni hnih chhungin unit 230 (mipa 175 leh hmeichhia 55) an pe a ni.

Vawiinah kawlphetha pe thei dawn lo

Power & Electricity department chuan vawiin hian 33KV sub-station-ah hna an thawh dawn avangin chawhma dar 10 aṭanga tlai dar 3 thleng Aizawla veng eng emaw zatah kawlphetha an pe thei dawn lo. Kawlphetha hmu lo tur vengte chu - Tuikual South, Treasury Square, Venghlui tlem, Dawrpui, Zarkawt, Chanmari, Chhinga Veng, Electric Veng, Saron Veng, Tuithiang, Bethlehem Bazar Road, Armed Veng, Armed Veng South, Aizawl Venglai, Ramthar Veng leh Ramthar North te an ni.

Thawk zui turin ti

Chief minister Lalduhoma chuan nimin khan Pediatrics Intensive Care Unit (PICU)-a thawk mek nurse 36 leh anmahni puitu mi 19-te, September 2024-a an hna tawpte chu an tel loa ICU tam tak a kal zui theih dawn loh avangin thawk chhunzawm turin a ti a; Health & Family Welfare principal director Dr Vanlalsawma chu hma la zui turin a hrilh. PICU-te hi Covid-19 len laia Emergency Covid Response Plan-2 aṭanga district paruka dinte a ni.

Synod Directory

Synod Telephone Direc-tory application siam thar chu nimin khan Synod Office Devotion Room-ah Synod moderator Rev. R Vanlalnghaka'n Pathian hnenah hlanin a tlangzarh. Directory tharah hian pastor, kohhran committee member-te leh Synod hnuaia thawkte phone number dah a ni a; apps hi Playstore leh Appstore aṭangin lâk (download) theiha dah tum a ni.

AR-in meth man

Assam Rifles sipaite chuan October 3, Ningani khan New Siahaah Myanmar lam mi mipa pahnih hnen aṭangin Methamphetamine gram 1,980 an man a, Rs 6,65,01,007 hùa chhût a ni. Meth leh a neitute hi AR chuan Siahaa Excise & Narcotics department hnenah an hlan a ni.

CM-in kâwm

Chief minister Lalduhoma chuan nimin khan a pisaah sorkar laipuia Ministry of Agriculture & Farmers Welfare joint secretary Yogita Rana a kâwm. CM hian Ministry of Agriculture & Farmers Welfare hnuaia Mission Organic Value Chain Development for North Eastern Region chu Hand Holding Policy nen ṭha taka kalkawp thei a nih thu sawiin, ṭha zawka Mizorama kalpui turin Yogita Rana a chah. Yogita Rana chuan an hmalakna leh hmachhawpte CM a hrilhfiah ve bawk.

NCD awareness

National Programme for Prevention and Control of Non Communicable Diseases leh Women’s Polytechnic, Aizawla BCC department-te chuan nimin khan Women's Polytechnic-ah Non Communicable Disease Awareness Campaign & Screening an buatsaih. Natna inkai chhawn theih loh chi hrang hrang - thisen sang, zunthlum, etc. te vei lo tura fimkhur ngaihnate inhrilhfiah a ni. Zirlai leh thawktu mi 180-te hriselna endik a ni bawk.

Minister-in tlawh

Health & Family Welfare minister Lalrinpuii chuan nimin khan Saitual District Hospital a tlawh. Minister hi damdawi-in hotute nen an inkâwm a, a hnena mamawhte an thlenah theihtawp chhuaha hmalakpui zel a inhuam thu a sawi. Minister hian khawtlang hruaitu te, Joint VC, YMA leh MZP hruaitute nen damdawi-in thar sakna tur hmunhma leh Chief Medical Officer office sak lai mekte an tlawh a ni.

Ropuiliani Museum

Social Welfare & Tribal Affairs department leh Mizoram University chuan nimin khan MZU-a School of Humanities & Language seminar hall-ah Ropuiliani Museum din mek chungchanga sawihona an buatsaih. Ministry of Tribal Affairs consultant (Tribal Freedom Fighter's Museum) Dr Kalyan Kumar Chakravarty , SWTA director Dr Lalhriatzuali Ralte, MZU Prof. Laltluangliana Khiangte, Dr Joseph Lalzarliana leh Dr Samuel L Chuaungo-te'n thu an sawi.