Champhaiah SARAS Fair 2024 ṭan a ni

5th October, 2024

Rural Development (RD) minister Prof. Lalnilawma chuan nimin khan Champhaia Aui Garden-ah Mizoram State Rural Livelihood Missions (MzSRLM) buatsaih Sales of Rural Artisans Society (SARAS) Fair, 2024 a hawng a; ram dang thil siam aia Mizoram self help group (SHG)-te thil siam hlut a, hnam rilru pua dàwr turin mipui a ngen.

SARAS Fair hi MzSRLM bultumin kum 2015 khan neih ṭan a ni a, kumin hi vawi 9-na niin, October 11, 2024 thleng a awh ang. Fair-ah hian Mizoram hmun hrang hranga SHG-te'n stall 44-ah an thil siamte an pho chhuak a ni.

RD Minister chuan, Champhaiah Hnahsín Kût ruala SARAS Fair buatsaih a ni chu remchang a tih thu a sawi a, "SARAS Fair tum ber chu SHG-te thar hralh chhuah leh mipui hmaa pho lanna remchan zawn a ni a, ram dang thil siam aia SHG-te thil siam hlutsak a, hnam rilru pu chunga dawr zel turin mipui ka ngen a ni," a ti.

SHG-te thil siam chu mipui hîp thei turin a tuamna (packaging) leh a hming (labelling) duan a nih thu sawiin Prof. Lalnilawma chuan, "Ei leh in kaihhnawih vawiina pho chhuahte phei chu Food Safety and Standards Authority of India registration nei vek a ni," a ti a; hmasawn ngaihna laiah thurawn dawng turin a enkawl department chu an inpeih reng tih a sawi.

Fair hawnnaah hian adviser to CM (Technical) H Ginzalala, Champhai North bialtu MLA ni bawk te,hamphai South bialtu MLA Lt.Col. Clement Lalhmingthanga, Mizoram Rural Bank chairman Sheryl L Vanchhawng, RD additional secretary Lalnunhlua leh MzSRLM chief executive officer Zosangzuali Pachuau te pawhin thu an sawi.

MzSRLM hi National Rural Livelihood Missions hnuaiah kum 2013 khan din a ni a, a tum ber chu thingtlanga harsa zawkte SHG hmanga khaichhuah leh ṭanpui niin, MzSRLM hian Mizorama district 11 leh RD block 28-te a tuam chhuak vek tawh.

SHG hnuaiah chhungkaw 81,829 an inziak lut tawh a, SHG-te khaikhawm turin village organisation 791 leh cluster federation 84 din a ni tawh. Mizoram puma SHG-te tan community fund cheng nuai 18,449.99 pek chhuah a ni tawh a; SHG 5,149-te'n loan cheng nuai 15,163.9 an la tawh bawk.