Congress hmabak a êng - Lalnunmawia Chuaungo

MPCC senior vice president Lalnunmawia Chuaungo chuan, Congress party sorkar chhan tur chu ZPM chêtsual vang ni loin, ram hmasawn zawkte ruala an pên ve theihna tur chu an tum bulpui ni se a duh thu leh, Congress hmabak hi a ên thu a sawi.

Lalnunmawia Chuaungo hian Mahatma Gandhi pian champha nimina Congress Bhavan-a an lawmnaah thu sawiin, "ZPM chetsual avanga sorkar tur kan ni lo a, eng vangin nge ram rorelna fawng chelh tur kan ni tih hi kan rilruah chiang se. Ram leh mipui tana rawngbawlna pawimawh a ni a, ram hmasawn zawkte ruala kan pên ve theihna tur hi kan tum bulpui ber ni se ka duh," a ti.

ZPM sorkar chu sawisel a la hun lo nia sawiin Lalnunmawia chuan, "Sorkarna an chelh ve chauh a, kum khat pawh a la tling lo. An sorkar hmain thil ṭha pui pui, an duhthusam an sawi nasa a, chuvang chuan mipuiin an thlang tling a, kum khat tlin hmaa sawisel hi kan duh lo va, châk pawh kan châk lo. Amaherawhchu, ram leh mipui tana thil pawi an khawih tâk mawlh mawlhah chuan mipui thlahvâng hauhin kan rawn ti ve ta zeuh zeuh a ni," a ti a; ZPM sorkar thil tihsualte mi nin khawp sawi tur a awm tawh niin a sawi.

Lalnunmawia Chuaungo chuan, Congress party-in hma an sawn nasa nia sawiin, "Thil chîk mite chuan MP inthlan lehah chuan Congress kan sorkar ngei an ring. Congress hmabak hi a êng a, Mizoramah pawh, 'Congress bak hi beiseina nghahna tur an awm lo a nih hi mawle,' ti an tam tawh a ni," a ti.

MPCC Senior Vice President chuan, ram rorelna siamṭhat te, mirethei, kut hnathawktu leh mahni kutkawiha eizawngte hmakhua chu an dah sân ber turte zing a mi a nih thu a sawi a; "Thingtlang kut hnathawktute chauh ni lo, khawpuia sorkar hnathawk ve lo eizawnna hrang hrang thawkte tan pawh ruahmanna kan siam dawn. Congress chuan kan ti ang kan tih chu kan ti ṭhin," tiin, chu chu NLUP-ah a chian thu a sawi.

Inkhawmah hian Mahatma Gandhi pian champha vawi 155-na pualin MPCC general secretary C Chawngkunga'n thu a sawi a ni.