Kawngpui chhiat chhan sorkar inthlahdah vang - Sawmvela

MNF general secretary K Lalsawmvela chuan, Mizorama kawngpuite chhiat chhan chu sorkar inthlahdah vang a nih ber thu leh, MNF sorkar liam ta hun laia Mizoram kawng chu Mizoram PWD chanchina kawng ṭhat lai ber a nih thu a sawi.

K Lalsawmvela hian nimina Mizo Hnam Rûna MNF party chhung inkhawmah thu a sawi a; "Tuna kan kawng chhiat chhan chu sorkar a inthlahdah vang a ni ber mai. Sorkar hmasa aṭanga an chhawm sum ṭhahnem tak a awm a, chu'ngte hmang chuan kawng an siam lo a ni," a ti.

MNF sorkar kal ta chhungin kawng siamna leh enkawlna atan PWD minister Zoramthanga'n pawisa a pe ṭha hle nia sawiin Lalsawmvela chuan, "Survey kan neihnaah Mizoram kawng kha very good leh good-ah 55%-65% a awm a, Mizoram PWD history-a kawng kan neih ṭhat lai ber a ni," a ti a; chutih rualin, Covid vangin sum a harsa a, MNF sorkar tawp lamah chuan kawng dinhmun tlema a hniam ve hret thu a sawi.

K Lalsawmvela chuan, press conference a neiha a thu sawite ZPM thupuangtu K Laltluangkima'n a chhàn lêtnaah sawi dik lo a nei nual tih a sawi a, "Agreement dik lo ziaka PWD officer a puh kha a dik lo, dan ang thlapin kha agreement kha ziah a ni. Kawnpui-Khamrang contract agreement-ah EPC contract kalphunga la awm ngai lo a inzep nuala a sawi hi a vaiin a dik lo vek... A hriat kim lohah huai takin a ṭawng hi a zialo hle a ni," a ti.