Synod Hospital College of Nursing-in Lamp Lighting leh Graduation hmang

Synod Hospital College of Nursing chuan October 3, Ningani khan an college hall-ah Lamp Lighting Ceremony leh Graduation Day vawi 20-na leh Oath Taking vawi 51-na an hmang a, Synod moderator Rev. R Vanlalnghaka'n a hmanpui.

Inkhawmah hian zirlai ti ṭhate hnenah moderator Rev. R Vanlalnghaka'n lawmman a sem bakah thu a sawi a; Synod executive secretary Rev. VL Luaia Hranleh-in award hrang hrang a sem bakah, graduate tharte leh zirlai tharte ṭawngṭaisakna hun a hmang. Nursing superintendent Ramfangzauvi kaihhruaiin zirlaite'n bati chhíin thutiam an sawi a; Synod Hospital director Dr Lalṭhakima'n thu a sawi bawk.

Synod Hospital Nursing School-in Ningania zirlai a thlah tâkte leh zirlai lut thar a lawm luhte chu mi 30 ve ve an ni a; batch khatah zirlai 30 zel lak niin, tun dinhmunah zirlai 120 an awm mek.

Synod Hospital hi kum 1928-ah din niin, nurse zirna, nursing school din ve nghal a ni a, nurse zir hmasa ber chu Khuangi, kum 16 mi a ni. Nursing school hi kum 1944-ah Indian Nursing Council-in nurse puitling zirna turin recognition a pe a, June 20, 2019 khan nursing college-ah hlankai niin, B.Sc. Nursing zirna a ni.