RBI kum 90-na pual quiz buatsaih

Reserve Bank of India (RBI) chuan an kum 90 tlinna an lawm mek a, nimin khan Vanapa Hall-ah RBI90Quiz – State an buatsaih a, Pachhunga University College aṭanga telte pakhatna an ni. Quiz hi Education minister Dr Vanlalthlana leh RBI general manager T Lhungdim ten an hmanpui.

RBI90Quiz hi kawng chi hrang hrangin buatsaih a ni a, September 19-21, 2024 chhung khan online phase kalpui niin, college hrang hrang aṭanga team telte aṭangin state level round-a tel turte thlan a ni.

Nimina buatsaih state level round-ah hian team 45 (zirlai 90) an tel a, Pachhunga University College aṭanga tel Lalmuanpuia Sailo leh Shouvik Sarkar te chu pakhatna an ni. Pakhatna hian Rs 2,00,000 an dawng a; pahnihna PUC aṭang veka telte'n Rs 1,50,000 an dawng a, pathumna National Institute of Technology, Mizoram aṭanga telte'n Rs 1,00,000 an dawng.

State level-a pakhatna team hi kumin November 21 leh December 4-a zonal round-ah an tel dawn a, national final chu December-ah Mumbai-ah neih a ni ang.