Ruihhlo laka fihlim turin zirlaite chah

Kolasib District Secondary School Sport vawi 20-na chu nimin khan Kolasib Sports Stadium-ah khâr a ni a, Assembly deputy speaker Lalfamkima, bialtu MLA-in hmanpuiin, zirlaite chu ruihhlo laka fihlim turin a chah.

Kolasib District Secondary School Sport 2024 hi October 1-4, 2024 chhunga neih a ni a, Kolasib district-a sikul 29 aṭangin zirlaite infiamna chi hrang hrang hmangin an intihsiak a, St. John Higher Secondary School chu pakhatna an ni.

Lalfamkima chuan, mahni inthunun a pawimawh thu sawiin, "Ruihhlo lak ata inthiarfihlim a, tichhin lo turin zirlaite ka ngen che u a ni. Tun hnaiah ṭhalaite zingah mahni nunna lak duhna a tam chho ta hi a veiawm a, huaisen takin in nuna thil thlengte hmachhawn ang che u," a ti a, huaisenna chuan rilru natna tam tak a hneh theih thu a sawi.

Infiamna chu zirlaite tan a ṭangkai tih sawiin Lalfamkima chuan, "Sikula in zirlai ngawr ngawr ni lo, in theihna dangte pho chhuahna hun a ni a, a district ang zawng pawha sports lama ṭan kan lak chhoh a ngai. Infiamna piah lamah zirlai ngaih pawimawh a ṭul a, zirlai hlawhtling nih a pawimawh," a ti a; taimakna leh rinawmna nen hlawhtlinna chang ngei tura zir turin zirlaite a chah a ni.