Kawng ṭha zawk kan neih theih nan theihtawpin hma kan la dawn - CM

Chief minister Lalduhoma chuan October 5, Inrinni khan Sairang leh Khamrang (Durlui) inkara kawng chhe laite a tlawh a; kawng ṭha zawk a awm theih nan theihtawpin hma an la dawn tih a sawi.

Chief Minister chuan, Sairang leh Durlui inkarah kawng chhia a awm tih an hriat avangin an tlawh tih a sawi a, "Hmun li/nga velah chhia a awm a, siam har lutuk a ni lo. Hnathawktu NHIDCL-te'n hmanruate la khawmin an siam mek. October 9 hma ngeia siam zo turin kan hrilh a, siamṭhat hman min tiam," a ti.

Sairang leh Durlui inkar kawng chu a ṭhen PWD enkawl, a ṭhen NHIDCL enkawl a nih thu sawiin Lalduhoma chuan, "Mipui tan leh keini tan pawh tu enkawl zawk nge tih hriatthiam a har ṭhin. He lai kawng chhe lai hi NHIDCL enkawl a ni a, Mizoram sorkar mawhphurhna a ni chiah lo," a ti a, NHIDCL-te'n an siamṭhat thuai an beisei thu a sawi.

CM Lalduhoma chuan, kawng a chhiatin tu mawhphurhna nge tih hriatthiam a harsa ṭhin tih sawiin, "NHIDCL nge PWD tih hriat a har ṭhin. NHIDCL hnuaiah Mizo sub contract-te an awm a, an mawhphurhna pawh a ni ve. A ṭul a nih chuan sub-contract-te lâk belh a, sub-contract thawk ṭha lo an awm a nih chuan thlâk mai turin kan inti a ni," a ti.

Kawnpui-Khàmrâng inkar kawng chungchang sawiin CM Duhoma chuan, "Satguru enkawl a ni a, an enkawl hun chhung (defect liabilities period) hi nakkum thleng a ni a, agreement-ah a enkawl zuina tur cheng nuai 12 vel chauh an dah," a ti a; nakkum aṭanga NHIDCL lak chhawn tur a nih chauh avangin tun dinhmunah an lak chhawn duh loh thu a sawi.

Lalduhoma chuan, Mizoram sorkar mawhphurhna ni chiah lo mah se, mipui harsatna hrethiamin state suma siam mai ṭha an tih thu sawiin, "Satguru pawh kan bàntir a, an pawisa deposit cheng nuai 35 pawh kan chhuhsak nghal. Kan pawisa sensoin kan siam mek," a ti.

Chief Minister chuan, kawng chhia chuan pawisa ruahman sa nasa taka a tihdanglam thu a sawi a, "Sên lohna tura ngaihah kan sêng nasa em em. Kawnpui-Khamrang chu sawisel tur vak a awm tawh lo, PWD lamin an thawk nasa hle. Kawng ṭha zawk kan neih theihna atan sorkarin theihtawpin hma a la dawn," a ti a; Mizoramin kawng ṭha zawk a neih ngei a beiseiawm thu a sawi.