Hnahsin Kûtah Tourism Minister tel

October 5, Inrinni khan Champhaiah Hnahsin Kût hman chhunzawm a ni a, Tourism minister Lalrinpuii'n a hmanpui. Minister chuan, Mizoram sorkarin tourism-ah kalphung thar, khawtlanga innghat tur community based tourism kalpui a tum thu a sawi.

Tourism Minister chuan, sorkar hmalaknaa khualzinte hìp tumna chu miin ngaiah an neih ṭhin thu leh a hlawhtlin tâwk loh ṭhin thu a sawi a, "Mizoram sorkarin tourism-ah kalphung thar - community based tourism kalpui a tum a, sorkar chuan mipuite hmalaknaah an hnung a dâwl ṭhin dawn a ni," a ti.

Hnahsin Kût buatsaihtu Champhai Nature Conservancy huaisenna leh Champhai mipuite thawhhona chu ropui a tih thu sawiin Minister chuan, "Mizoram sorkar ang leh Tourism department enkawltu ka nih angin thinlung takin ka lawm. Hnahsin Kût avangin miin Champhai pan an châk a, kût ṭan hma hauha thlenna tur awm tawh lote khan kût hlawhtlin zia a lantir," a ti a, sorkarin tourism kalpui a tum dan hlimthla lanna a nih thu a sawi.

Lalrinpuii chuan, Champhai district chu hmunhma tihdanglam ngai lo hmun mawi, Mizo pi leh pu sûlhnu tam tak awmna a nih avangin khualzinte hîp turin theihna sang tak nei a nih thu a sawi a, "Swadesh Darshan 2.0 hnuaiah tourism chawikànna tur hmalakna hrang hrang kalpui thuai tum a ni. Hnahsin Kût hi mipuite phûrna meichher hmangin chhit ên a ni tawh a, hei aia nasa zawkin alh zel se ka duh," a ti.

Hnahsin Kut hmanna inkhawmah hian Tourism Minister-in Tourism department-in Hnahsin Kût puala North Eastern Council aṭanga sum an hmuh chu Hnahsin Kût Organising Committee hruaitute hnenah a hlan a, Kût puala intihsiakna lawmman a sem bawk.

NEC aṭanga Hnahsin Kût atana sum hmuh Minister-in a pek hi Rs 8,00,000 a ni a; lehkha pawimawhte a fel hunah Rs 2,00,000 dang pek leh tur a nih thu sorkar thuchhuahin a tarlang.

CYCLING COMPETITION
Elite Category
1-na Mesak Vanlalvena
2-na Peter Zohmingliana
3-na T Lalnunmawia

Junior Category
1-na Vanlalruata
2-na Lalrinsanga
3-na Hmingsangbera

Masters Category
1-na David Rualzakhuma
2-na Gospel Lalhmingmawia
3-na C Lalnunmawia.

PAINTING COMPETITION
High School Category
1-na HT Malsawmtluangi, Springdale Academy
2-na Vanlalṭhakima, Hnahlan HS
3-na Abisag Lalhruaithangi, Academy of Art & Scienc

HSS & College Category
1-na Rualchhingi, GM HSS
2-na Lawmsangzuali, GM HSS
3-na Lalzarmawii, Einstein HSS