Rethei taka awm tura din kan ni lo - B Lalchhanzova

Guwahati Mizo Students Union (GMSU) chuan October 5, Inrinni khan NEZCC auditorium-ah zirlai thar lawmna leh thlahna hun an hmang a, khuallian minister of state B Lalchhanzova chuan, Mizote chu rethei taka awm tura din an nih bik loh thu a sawi.

B Lalchhanzova chuan, Mizoram luah chin hum thiam a ṭul thu sawiin, "Retheihna hian dawihzepna a ken tel ṭhin avangin state hausa, mahni kea ding thei tura hmathlir mumal tak neih a ṭul," a ti a; Guwahati-a zirlai awmte chu an awm chhan hre reng a, pangchanna rilru dah bo a, a ṭul huna maltlat ngam tur leh hnam dangte nen inkungkaihna ṭha siam zel turin a chah.

Hnama dintu leh ram petu Pathianin Mizote chu rethei taka awm a, hnam dangte thil neih dil reng turin a din lo tih sawiin B Lalchhanzova chuan, "Mahni kea ding a, hnam dangte'n an chung-en theih tur hnam ni turin min duh. Mizote kaltlang hian Pathianin khawvel hmaah inchawimawi a duh a, hnam hausa ni turin kan rilru put dan hi i thlak ang u," a ti.

North Eastern Zone Cultural Centre-a GMSU inkhawmah hian hruaitu thar thlan a ni a, zanriah an kîlho nghal. GMSU hi kum 1997-ah din a ni a, member inziak lut 305 an awm mek a ni.