IndiGo thlawhtheihna a lêtin tipung CM-in Lengpui Airport-ah a vailiam

IndiGo Airlines-in Delhi leh Aizawl inkara thlawhtheihna a leta an tihpun chu October 5, Inrinni khan chief minister Lalduhoma'n Lengpui Airport-ah a vailiam. CM chuan, Lengpui Airport chu a ṭul anga tuaihnùm zel a nih tur thu leh Mizoram hmun ṭhenkhatah heliport din a nih tur a sawi.

IndiGo Airlines hian chawlh­kar khat chhunga Mizorama thawlhtheihna vawi nga an thlawhtir ṭhin chu vawi 10-ah an tipung dawn a; ni tina thlawk a awm bakah, Nilaini, Zirtawpni leh Pathianni-ahte vawi hnih thlawk a awm dawn a ni.

Lalduhoma chuan, Mizoram mamawhna hriatpuia hma latu Ministry of Civil Aviation leh IndiGo Airlines-te chungah lawmthu a sawi a, "India ram laili leh Mizoram chu inpawhna nasa lehzualin min siam dawn a, official-te chêt velna atan te, sumdawngte'n hma thar an lakna atan te, phai lam pan ngai damlo tante leh zirlaite tan a ṭangkai em em dawn. Kan ram mawi tak hi tlawhpawh awl lehzualin min siamsak a ni," a ti.

Chief Minister hian thlawhtheihna thlâwk tihpunaa thlâwk chhuak hmasa ber tur lawmna cake a zai a, a chuang tur passenger thlan chhuah pakhat hnenah boarding pass a hlan bakah, thlawhna thlawk chhuak tur a vailiam a ni.

CM Lalduhoma chuan, Mizoram sorkarin civil aviation hmasawnna lamah hma a la chho zel dawn tih sawiin, "Lengpui Airport hi a ṭul anga tuaihnùm chhoh zel a ni dawn," a ti a, Mizoram hmun ṭhenkhatah heliport din a nih tur a sawi. Heliport hi helicopter emaw, tlan phawt ngai loa thlâwk kâng nghal theite ṭumna leh thlawh chhuahna a ni.

IndiGo Airlianes special director R K Singh pawhin thusawiin, thlawhtheihna an thlawh belhtir chuan India ram laili leh Mizote inkarah inunauna ṭha leh inpawhna nghet zawk a siam an beisei thu a sawi a, "Mizoramin thlai hralh tur a neih, thlawhtheihnaa phurh chhuah theih dan tur pawh kan lo dap ang a, a hranin ruahmanna duan kan tum ang," a ti.

Sorkar thuchhuah chuan, IndiGo-in Aizawla thlawhna a lêta an tihpun chhan chu 2024 kum tira Chief Minister-in Ministry of Civil Aviation hotute nen Delhi Mizoram House-a an inkawmnaah, thlawhtheihna tam zawk thlawhtir a rawtna tihhlawhtlinna a nih thu a tarlang.

IdiGo tlawhna vailiamnaah hian Lok Sabha MP Richard Vanlalhmangaiha, MLA H Lalzirliana, chief secretary Dr Renu Sharma, secretary to CM Vanlaldina Fanai bakah, Civil Aviation official-te leh IndiGo Airlines hotute an tel a ni.