Thawktu indaih lohna phuhru turin sorkarin theihtawp a chhuah - Lalrinpuii

Health & Family Welfare minister Lalrinpuii chuan October 5, Inrinni khan Champhai District Hospital, AYUSH building, GNM Nursing School leh Chief Medical Officer (CMO) pisate a tlawh a; Health department-a thawktu indaih lohna phuhru turin thawktu eng emaw zat lak phalna HFW-in an neih tawh thu a sawi.

HFW Minister chuan, Mizoram sorkarin thawktu indaih lohna phuhru turin theihtawp a chhuah mek tih sawiin, "Health worker 51, pharmacist 17, nurse (contract) 40 bakah, drugs inspector leh dialysis technician-te lak phalna kan nei tawh," a ti.

Lalrinpuii chuan, "Chief minister Pu Lalduhoma hmalaknain Pediatrics Intensive Care Unit (PICU)-a thawk mek nurse 36-te leh anmahni puitu mi 19-te September 2024-a an thawh hun tàwp turte chu thawk chhunzawm zel tura tih an ni," a ti a; Champhai District Hospital mamawh Orthopaedic surgeon pawh NHM hnuaia la turin hma an lak mek thu a sawi.

Champhai Hospital chu damdawi-in fai lawmman, Kayakalp award dawng tawh a nih angin thawktute chu faina leh damlo enkawl kawngah an hnathawh ṭhate chhunzawm zel turin Minister chuan a chah a; Champhai District Hospital, CMO, AYUSH leh Nursing School hotute'n an mamawh hrang hrang an lo thlenah a theih anga hmalakpui a tum thu a sawi bawk.

Champhai South bialtu MLA Lt.Col. Clement Lalhmingthanga pawhin thu sawiin, Champhai District Hospital chu khawchhak tlangdung mipuite'n an pan ber a nih avangin tihhmasawn a ṭul thu a sawi a; District Hospital mamawh pakhat - Trauma Centre panna (ramp) chu a remchan anga ngaihtuahsak a tum thu a sawi.

Tourism minister ni bawk Lalrinpuii hian Inrinni vek khan Champhai Vengsanga Agriculture Rest House hmun hlui muala Convention Centre sak tumna hmun a tlawh nghal a ni.

Minister Lalrinpuii hi adviser to CM TBC Lalvenchhunga, OSD to CM R Lalrodingi, Health & Family Welfare principal director Dr Vanlalsawma leh Health Services joint director Dr Lily Chhakchhuak te pawhin an ṭawiawm a ni.