Tum mumal nei turin zirlaite chah

Pang Zirlai Pawl (PZP) Joint Headquarters, Aizawl chuan October 5, Inrinni khan IPR Auditorium-ah zirlai tharte lawmna leh zirlai ti ṭhate lawmpuina hun an buatsaih a; District Council & Minority Affairs (DCMA) minister C Lalsawivunga'n hmanpuiin, tum mumal nei turin zirlaite a chah.

C Lalsawivunga hian Páng zirlaite chu tum mumal tak nei chunga lehkha zir tur te, Pathian ṭih a, nu leh pate chawimawi tur leh thawhrimna hmanga hlawhtlin tum turin a fuih a ni.

DCMA Minister chuan, hna thawh hreh nei lo tur leh thawk loa awlsam taka sum lak luh tum lo turin zirlaite a chah a, "Mahni zâwn ṭheuhah taima leh rim taka thawkin, a thlawna dawn leh sem ringawt beisei lo u la, zirna hi hmasawnna rahbi pawimawh a ni a, ram leh hnam tan a ni tih hriain thiamna tak tak nei turin lehkha zir ang che u," a ti.

Mizorama chi bil leh hnam péng hrang hrangte chu Mizo nihnain phuar khawm zel se a duh thu sawiin Lalsawivunga chuan, "Inla hrang tham leh inen hrang tham kan awm lo a, inpumkhat leh lungrual taka kan chenho hian hnama chhiar tham leh zahawm kan nih phah. Hnam anga kan dinchhuah theih nan inunauna leh inpumkhatna dah pawimawh a ṭul a, mahni awmna hmun ṭheuhah ram leh hnam chhan nan theihtawp chhuahin rinawm leh huaisen taka hmalak a ṭul," a ti a; ram leh hnam intodelh ni tura ṭan lakpuiah zirlai­te a sáwm.

Inkhawm hi PZP, Aizawl vice president John L Malsawma'n a kaihruai a, Páng zirlai ti ṭha mi 23 hnenah lawmpuina thilpek hlan a ni.