Mi 1,10,279-in PM Kisan dawng

Kut hnathawktute tuam hlawmna, PM Kisan hnuaia 18th instalment sum chu October 5, Inrinni khan prime minister Narendra Modi chuan Washim, Maharashtra aṭangin kut hnathawktu mi nuai 940 chuang hnenah direct benefit transfer (DBT) kaltlangin a sem. Hamṭhatna dawngtu zingah Mizorama kut hnathawktu 1,10,279 an tel.

PM Kisan 18th instalment sum semna hi Mizoram aṭangin online-in Agri-

culture & Farmers Welfare secretary Ramdinliani hoa chhim a ni a; Agriculture & Farmers Welfare director, additional director, joint director leh district tina district agriculture officer-te an tel.

Scheme-a inziak lutte chuan thla li danah Rs 2,000 zel an dawng a, kum khatah Rs 6,000 an dawng ṭhin. Ṭanpuina sum hi bank account-ah DBT hmanga pek ṭhin an ni. Mizorama ṭanpuina dawngtu kut hnathawktu mi 1,10,279-te hnenah a vaiin cheng nuai 3,167.82 sem chhuah a ni a, kum 2024 chhunga second instalment a ni.

Sorkar thuchhuah tarlan danin, kut hnathawktute chanchin kimchang chhui chhuah theih loh leh chinfel ngai leh paih ngai tam tak hmuh chhuah mek a ni a; dawng tlak, la inziak lut lote tan inziah luh theih reng a ni. Hre chiang duh chuan mahni awmna district-a DAO-ah leh Agriculture & Farmers Welfare directorate hnuaia Project Monitoring Unit - PM KISAN-ahte ngaihven theih a ni.