CS hoin UIDAI chungchang sawiho

State Unique Identification Implementation Committee chu October 4, 2024 khan Secretariat conference hall-ah chief secretary Dr Renu Sharma kaihhruaiin an ṭhu a, Guwahati-a Unique Identification Authority of India (UIDAI) Regional Office deputy director general Commodore Dhiraj Sareen-in a telpui.

Dr Renu Sharma chuan, kum 5 leh kum 15 nih hunah Mandatory Biometric Update (MBU) neih a pawimawh thu a sawi a; sikul naupangte'n samkhai zawka biometric an update zung zung theih nan sikulah special MBU camp neih dan ruahman turin School Education department a hriattir.

UIDAI deputy director general Cmde Dhiraj Sareen chuan Mizoram sorkar chu online Birth Registration No. (BRN) kaltlanga naupang kum 5 hnuai lamte ziah luh zel tum turin a fuih a; registrar-te chu nau piang hlimte an pian hnu lawkah Aadhaar number pek chhuah nghal zung zung an nih theih nan Birth Registration Based Aadhaar Enrollment (BRBAE) kalpui turin a chah.

Mizoramah BRBAE kalpui a nih theih nan National Health Mission, Mizoram chu UIDAI hnuaiah registrar atan ruat a ni a; hlawhtling taka BRBAE kalpui a nih theih nan UIDAI chuan nau piangte Civil Registration System (CRS) portal-a ziah luh zung zung a nih theih nana state policy ruahman turin rawtna a siam a ni.

Ṭhutkhawmah hian Aadhaar enrolment kalpui dan te, MBU leh BRBAE chungchang bakah district Aadhaar monitoring committee-te hnathawh dante an sawiho a ni.