KHAWTHLIR

Lirthei dan bawhchhia 393

Aizawl District Transport Office (DTO) hnuaia enforcement staff-te chuan September 2024 chhung khan lirthei dan bawhchhia 393 an man a, an pawisa chawi tlingkhawm chu cheng nuai 14.53 a ni. Aizawl DTO hnuaia enforcement staff-te hian September chhung hian lirthei 3,364 an endik a, chu'ng zinga 393 chuan dan an bawhchhia a ni.

AR-in heroin man

Assam Rifles sipaite chuan October 4, 2024 khan Champhai Zote huam chhungah mipa pakhat hnen aṭangin heroin (no. 4) hawng 10 an man a, cheng nuai 85.85 hûa chhût a ni. Ruihhlo leh a neitu hi Champhaia Excise & Narcotics department hnenah an hlan.

Kawng thawm ṭha

Armed Veng Local Council leh PWD ṭang dun chuan October 5, Inrinni khan Armed Veng chhunga kawng chhe zual lai ṭhenkhat an thawm ṭha. Armed Veng LC-te'n lung (boulder) leh ei tur an tum a, hmanraw mamawh dangte PWD-in an tum thung. Armed Veng North Presbyterian Kohhranin a ṭul apiang hman atan Rs 2,000 an thawh bakah, tui an tum bawk.

Minister-in kâwm

Minister Lalrinpuii chuan October 4, 2024 zan khan Champhai Circuit House-ah Champhaia sorkar department hotute a kâwm a; Champhai chu Indo-Myanmar border luhka a nih angin ruihhlo donaah hma hruaitu ni turin sorkar hnathawkte a ngen. Lalrinpuii hian October 4 vêk khan Khawzawl District Hospital a tlawh bawk a, hmunhma leh damlote tlawhin, an mamawh an lo hrilhte chu a ṭul ang zela tihhlawhtlin a tum thu a sawi.

Truck chesualah thi

Nimin zing dar 8 vel khan Chamring khaw dáiah Guwahati aṭanga bungraw dah tura Lunglei pana tlân truck pakhat chu tuihawk luankawrah tlan lutin kopang a sú a, a hmunah a khalhtu a thi a, handyman erawh a hliam na lo. Truck-ah hian driver leh handyman an chuang a, Guwahati mi ve ve an ni. Truck driver hi nimin chhun dar 11:30 velah truck aṭangin lak chhuah a ni a, Chamring Branch YMA-in kuanga an dah hnuah postmortem turin ZMC panpui a ni.