CM-in Seminar on Cyber Crime a hawng: Sawisel duh kan neih chuan puitling takin hmaikawr vuah loin sawisel mai ila - CM

Mizoram Journalist Association (MJA) Gen. Hqrs. leh Home department ṭangkawp chuan nimin khan Serchhip Press Club-ah 'Seminar on Cyber Crime' an buatsaih a, a hawngtu chief minister Lalduhoma chuan sawisel duh neih chuan puitling takin, hmaikawr vuah loin sawisel mai ila a duhthu a sawi.

Chief Minister chuan sorkar lakluh nia thuthar thehdarhtute a kawmnaah fake account hmanga midang beih chingte chu a ṭul anga an umzui zel tur thu a lo sawi tawh thu sawiin, "Sawisel duh kan neih chuan puitling takin, hmaikawr vuah loin sawi mai ila. A awihtu leh a dawngsawngtu tan pawh a ṭha zawk ve ve," a ti.

Lalduhoma chuan fake account hmanga dawihzep taka midangte beihna a tam chhoh telh telh a hlauh thu sawiin, "Heng fake account hmanga inbeihna ang chi hi kan sim loh chuan ṭhenawm khawveng inbeih nante pawh kan hmang thei," a ti a, fake account hmanga inbeih chuan khawtlang nun a tihchhiat theih thu a sawi.

Cyber crime leh a kaihhnawih thilte palzam mai mai lo tura a tuartute chahin Chief Minister chuan, "Eng emaw thil felhlel deuh an tawk a nih chuan dan kengkawhtute hnenah a rang thei ang bera hriattir ṭhin tur. Mipui him theih nana zirtirna uar taka kalpui zel a, cyber crime hriat chian lehzual zel a pawimawh," a ti.

Chief Minister chuan information technology-ah hmasawnna a chakin, an ṭangkaipui tawh hle tih a sawi a, "Sorkar pawh hi a hmang uartu a ni. Website nei lo department kan awm tawh loh ka ring. Sum leh pai chelekna kawngah pawh inter­net banking te, internet transfer te, inter­net behchhana investment te kan uar tawh," a ti a, ni tin nunah awlsamna tam tak an hmuh phah rualin, misualte pawh­in technology ṭhangduang tak hi mi bum nan an lo hmang ve mek thu a sawi.

Thuthar thehdarhtute puala cyber crime zirhona buatsaih a ni chu lawmawm a tih thu sawiin Lalduhoma chuan, "Journalist-te chu mipuite zirtirtu an nih avangin vawiina in thil zir hi mipuiten zau taka an hriat ka beisei," a ti a, hetiang lam hawi inzirtirna ngaihtuah chhuaktu MJA hruaitute chungah lawmthu a sawi.

Seminar atana resource person Cyber Crime addl. SP Zonunsanga chuan cyber crime awmzia leh social media hrang hrang hman fimkhur a ṭul dan a lem nen a sawifiah.

Cyber Crime Addl. SP sawi danin, cyber crime hnuaiah hian thil tisualtute hremna atan Information Technology Act, 2000, BNS (Bharatiya Nagarik Sanhita) section 351(3)(4), section 79, section 294(2)(a), 356(1), 351(2), Copyright Act Section 63 leh Cinematography Act section 7(1) hman theih a ni.

Seminar on Cyber Crime hi MJA president C Lalrambuatsaiha'n a kaihruai a, Serchhip District MJA president C Lalhminghlua'n inlawmna thu sawiin, MJA gen. secretary K Zothanpara leh Serchhip District MJA secretary T Biakchamlianate'n report tlangpui an pe. Seminar hi district tinah neih tur a ni.