Oct. 26 & 27-ah kohhran pariat telna Council of Churches hawn a ni dawn

Mizoram Kohhrante Inpum-khatna Joint Committee hruaitute chuan nimin khan Aizawl Press Club-ah thuthar thehdarhute an kawm a; October 26 & 27, 2024 khian Mizorama kohhran hrang hrangte thawhhona leh rawngbawl tlânna tur Council of Churches in Mizoram (CCM) hawnna inkhawmpui an neih dawn thu an sawi.

Mizoram Kohhrante Inpumkhatna Joint Committee hruaitute chuan October 26 & 27, 2024 khian Mission Veng Presbyterian Kohhran biak-inah Mizorama kohhran hrang hrangte thawhhona leh rawngbawl tlânna tur Council of Churches in Mizoram (CCM) hawnna inkhawmpui neih a nih dawn thu an sawi a, "CCM hmanga kohhran inpumkhatna hi conciliar unity anga kalpui tur a ni a, kohhran hrang hrangte kan chìn dan inang leh lungrualna (common ground) aṭanga thawhhona neih tum a ni. Thurin (doctrine) leh chìn dan (tradition) lama kan in an lohnate chu dah ṭhain, kan rama mimal nun, khawtlang leh sorkar thlenga kan inrelbawlna tih hmasawnna kawngah kohhrante'n hma kan lak theihna turin inpumkhatna hi kalpui kan tum," an ti.

MCC rorel inkhawm hmasa ber chu October 26, 2024 chhun dar 12:30-ah Mission Veng Presbyterian Kohhran biak-inah neih a nih dawn thu sawiin Joint Committee hruaitute chuan, "Inrinni zan, Pathianni chawhma, Pathianni chawhnu leh Pathianni zanahte Pathian biak inkhawm neih a ni ang. CCM-ah hian full time-a thawktu tur general secretary leh thawktu dangte'n office an luah dawn a, office hmunhma turte la neih chhoh tum a ni," an ti a, October 28, 2024 khian Synod Conference Centre-ah CCM office lailawk tur hawn a nih dawn thu an sawi.

Joint Committee hruaitute chuan CCM-ah hian kohhran pariat - Mizoram Presbyterian Kohhran, Mizoram Baptist Kohhran, Evangelical Church of Maraland, Lairam Isua Krista Baptist Kohhran, Evangelical Free Church of India, Isua Krista Kohhran (Bualpui Ng), Independent Church of India leh Wesleyan Methodist Church of Mizoram an inziahluh tawh thu sawiin; la inziaklut ve lote chu tel turin an sawm nghal a, "He inpumkhatna hian kan ramah rah ṭha a lo chhuah ngei theihna turin leh Lal Isua zirtirna leh Chanchin Ṭha chu a lo darh zau zel theih nan kohhran mipuite thawkho turin kan insawm a ni," an ti.

Zawhna chhangin Mizoram Kohhrante Inpumkhatna Joint Committee hruaitute chuan, Mizoram Kohhran Hruaitute Committee (MKHC) chu issue base-a kal, mumal taka din leh office neia awm a nih loh thu leh a ṭul anga inkokhawma kal mai a nih thu an sawi a, "MKHC hi chu official taka pawl anga din a ni lo a, kum 1982-ah Lt.Governor Pu Kohli-a'n sorkar leh MNF inkara banphar turin kohhran hruaitute a kokhawma, khata ṭang khan joint committee anga kal chho zel a ni a, inkhawmpui leh rorel pawh a awm chiah lo. Khang ringawt kha chu a tâwk lo e, office neiin mumal takin inzawmkhawmin kal ila tih aṭanga council hi din chho kan nih avangin CCM hi chu official takin a kal chho dawn a, constitution-te pawh lungrual takin ruahmanna fel tak kan nei tawh," an ti.

CCM hruaitute chu kum hnih term zel a nih tur thu te, CCM kalzelna atan tun dinhmunah member kohhran pariatah interim budget siamin, thla ruk chhung atan cheng nuai 32 an ruahman thu te, society registration an buaipui mek thute leh CCM-a tel turin kohhran member 3,000 chin nih a ngaih thute an sawi. CCM hawnna inkhawmpui an neih tur chu kohhran mi a duh apiang tan chhim theih a nih thu an sawi bawk.