Mi tinten kan rilru put hmangah hma kan sawn a ngai - K Sapdanga

Urban Development & Poverty Alleviation (UDPA) minister K Sapdanga chuan nimin khan Mualpuia Aizawl College-ah 'Making Aizawl Liveable and Safety City' tih thupui hmanga UDPA hnuaia Aizawl Smart City Ltd. buatsaih 'National Symposium On Vision Aizawl City After 20 Years' a hawng a, mi tinten an rilru put hmangah hma an sawn a ngaih thu a sawi.

K Sapdanga chuan, Aizawl khawpui chu khawpui naupang tak a nih avangin kawng hrang hrangah hmasawnna tur a tam thu a sawi a, "A pawimawh ber chu mi tinten kan rilru put hmangah hma kan sawn a ngai a ni. Vawiina kan rilru put hmang leh awm dan hian kum 20 hnuah Aizawl khawpui awm dan tur a hril thui hle dawn a, vawiina college zirlai naupangte hian in fate tan Aizawl khawpui hi chenna tlak leh him a ni dawn em? tih ngaihtuahna chang in hriat ṭheuha, theihtawp inchhuah a, hma in lâk ve a ṭul hle a ni," a ti.

Zirlai naupangte chu hna zawngtu ni loa hna siamtu nih tum zawk tura chahin UDPA Minister chuan, "Rinawmna leh thawhrimnain hlawhtlinna a hringchhuak ṭhin a, sakhuana tel lo hlawhtlinna erawh chuan chapona a hring chhuak a, an tluchhe thuai ṭhin. Pathian ṭihna nen, rinawm leh taima takin in koa mawhphurhna tla chu huai tak leh chhel takin hmachhawn zel ang che u," a ti a; symposium chuan rah ṭha a chhuah ngei a beisei thu a sawi.

Symposium-ah hian session thum - inaugural, technical session I & II a awm a; hawnna (inaugural session) hi GAC Political Science department HoD Dr Lalmalsawma Khiangte-in kaihruaiin, GAC principal Lalbiakzuala'n inlawmna thu a sawi bakah, Aizawl Smart City Ltd. CEO CC Lalchhuangkima'n khuhhawnna thu a sawi.

Technical session I-ah ASUTP project co-ordinator HVL Zarzosanga'n 'Vision for Urban Mobility' tih thupui a sawifiah a, UDPA joint director Andrew Lalhruaia'n 'Vision for Infrastructure in Aizawl After 20 years', AMC joint municipal commissioner Lalremruata Kullai-in 'Urban Local Governance after 20 years in Aizawl' leh MZU Prof. Benjamin L Saitluanga'n 'Vision for Aizawl Livable City after 20 years' tih thupuite an sawifiah.

Technical session II hi nizan dar 7 khan GAC Political Science department asst. professor Dr C Lalengkima kaihhruaiin online kaltlanga neih a ni a; IIT Bombay-a Dept. of Humanities and Social Sciences PhD candidate Ramengmawia Bawitlung-in thu a sawi bawk a ni.