A ṭum lina atan Lengpui Airport enfiah

Mizoram State Project Monitoring Committee (MSPMC) chuan October 4, 2024 khan an vice chairman R Lal Rinawma hoin a ṭum li nan Lengpui Airport cheiṭhat hna thawk mek, 'Improvement & Upgradation of different facilities at Lengpui Airport' tlawhin hmalakna hrang hrangte an enfiah a; tun dinhmunah hnathawh mekte a kal ṭha thawkhatin an hria.

Sorkar thuchhuah tarlan danin, Lengpui Airport tihchangtlun hnathawh kal mek hi MSPMC hian tun hi vawi li an tlawhna a ni tawh a, heng an tlawh leh endiknate aṭang hian an thil hmuh leh siamṭhat ngai nia hriatte MSPMC General Body Meeting-a an sawiho hnuah rawtnate siamin a mawhphurtu department hnenah an lo thlen tawh ṭhin.

MSPMC hian Lengpui Airport cheiṭhat hna chungchangah hian kumin April 16 & 18 khan PWD, PHE, Power & Electricity leh GAD Aviation Wing hotute kawmin, contractor pahnih - Zoramchhana leh KR Construction (Kamrula Chhangte)-te an ko bawk a, ṭha taka hna a kal zel theih dan turte an sawipui a ni. Tun dinhmunah Lengpui Airport-a hnathawh mekte chu a kal ṭha thawkhat niin MSPMC chuan a hria a, ruahman ang taka a puitlin ngei theih nan a ṭul anga vil zui zel an tum.

MSPMC Vice Chairman hi secretary Lalthanzuala Ralte, task force Vanchhungi leh MSPMC member dang - Lalrinawma, Prof. Chawngsailova, Lalremsangi Fanai leh Samuel Zoramthanpuiate'n an ṭawiawm a; nodal department; PWD, Power & Electricity leh GAD Aviation Wing hotute'n an lo dawngsawng a ni.

Lengpui Airport an tlawh zawhah MSPMC team-te hian NH 44A-a Tlawng lui kanna tur steel arch (semi through bridge) lei dawh mek an tlawh nghal a; he lei hi Ministry of Road Transport & Highways project niin, EPC Mode-a thawh a ni a, contractor chu Poddar Infratech Pvt. Ltd., New Delhi a ni. Lei hi metre 545.300 a sei tur niin, agreement amount chu cheng vbc 36.99 a ni.

Lei dawhna hmanrua hrang hrangte chu testing laboratory-ah endik a nih hnua a tling chauh hman ṭhin a nih thu MSPMC team-te hi hrilh an ni a, hna thawh tawh chin hi MSPMC chuan ṭha thawkhatin a hria a, he hna hi December, 2024-ah thawh zawh theih beisei a ni.

MSPMC Team-te hi PWD senior SDO Lalthanmawia leh a thawhpuite bakah, Poddar Infratech Pvt. Ltd. engineer Sanjay Tiwari leh Sanjeep Mondal-te'n an lo dawngsawng a; hna thawh hmabak la awmte leh pawimawh hrang hrangte an sawiho bawk.