An hna ngaipawimawh ber turin CM-in sorkar officer-te a chah

Chief minister Lalduhoma chuan nimin khan Serchhip DC conference hall-ah Serchhip district-a sorkar department hotu (head of offices)-te a kawm. Chief Minister chuan, officer-te chu kohhran leh khawtlangah inhmang mah se, an hna ngaipawimawh ber turin a chah.

Lalduhoma chuan, sorkar hnathawkte inkarah te, service leh service inkarahte inelna dik awm se a duh thu a sawi a, "Mahni hma chauh thlir loin kan ram tana ṭha tur zawk kha kan en tur a ni. Officer-ten kan hnuaia thawkte mamawh leh harsatnate kan ngaihthla tur a ni a, kan ngaihven tur a ni. Kohhranah te, tlawmngai pawlahte kan inhmang ṭhin a, thil ṭha tak a ni. Nimahsela, kan hna hi i ngaipawimawh ber zel ang u," a ti.

Handholding Scheme kalpui turah handholders training an kalpui hmasa dawn tih sawiin Chief Minister chuan, "Nangni hi a taka kalpuitu turte in nih avangin a hlawhtlin ngei theih nan progress partner thlan aṭangin lo fimkhur ang che u. Kan flagship scheme hi hna hmasaah in lo nei zel dawn nia," a ti a, mipui tan theihtawp chhuaha thawk zel turin sorkar hnathawkte a chah a ni.

Inkawmhona hi Serchhip DC Paul L Khuma'n a kaihruai a, Serchhip district ad-ministration dinhmun tlangpui a sawifiah.