Chapchar Kût hman danah inrawnkhawm

Art & Culture minister C Lalsawivunga hoin nimin khan Aijal Club conference hall-ah sorkar hotute, pawl aiawh leh sawm bikte'n Chapchar Kût hman dan chungchanga inrawnkhawmna leh sawihona, Consultation Meeting neih a ni.

Inrawnkhawmna leh sawihona hun hi Vanneihtlaunga, Chanmari-in a kaihruai a; Art & Culture secretary Florence Zotluangpuii'n inlawmna thu a sawi bakah, sorkar department ṭhenkhat leh pawl hrang hrang aiawhte leh mimal sawm bikte'n Chapchar Kût hman tawh dan leh hman zel dan tur atana Art & Culture department-in a buatsaih zawhna leh chhannate sawihoin, rawtna hrang hrang an siam a ni.

Art & Culture minister C Lalsawivunga chuan, Chapchar Kût chu hlawhtling tak leh mipui ngaihven hlawh takin hman a lo nih tawh ṭhin tih a sawi a, "Vawiina inrawnkhawmna hi Kût lo hman tawh dante a ṭha lo e, a hlawhtling lo e, tihna lam a ni lo a, hlawhtling taka Kût kan lo hman tawh ṭhin chu huam zau zawka hmasawn belh zel theihna a awm em, tia inrawnkhawm hi buatsaih a ni," a ti.

Hnam ziarang leh chìn dan (culture & tradition) vawn nun kawngah leh hma a sawna a ṭhan zelna kawngah a tam thei ang ber mipui tel se an duh thu sawiin C Lalsawivunga chuan, Chapchar Kût hman danah hnam kalphung leh ziarang humhim chunga zawi zawia khawvel hmuh tura chhawpchhuah chu rilruah awm se a duh thu a sawi bawk.