Zu zawrh kan tum lo: Tawnluia

MNF senior vice president Tawnluia chuan, MNF party-in sorkarna an chan chuan zu zawrh chu kohhran leh tlawmngai pawlte'n an duh loh avangin zawrh chhunzawm an tum loh thu a sawi.

Tawnluia hian nimin khan Aizawl Press Club-ah thuthar theh­darhtute a kâwm a; Vanglaini palai zawhna chhangin, "Sorkarna kan chan chuan zu zawrh chungchangah kohhran leh khawtlang hruaitute ráwn chungin thil kan kalpui ang. Kohhran leh khawtlang hruaitute hian zu zawrh an duh loh avangin MNF thutlukna tur chu hriatthiam theih saah kan ngai," a ti.
Tawnluia chuan, ZIDCO, MAM­CO leh MIFCO-te zu zawrhtir an ni chu an din chhan leh hmalak dan tura ruahmanna, Certificate of Incorporation leh Memorandum of Association kalh niin a sawi.
MNF senior vice president chuan, NLUP chu kum 2015 thleng tur a nih avangin NLUP tuihnâ chu a kang chat mek nia sawiin, "Beiseina la neite pawhin beiseina a bo mek tih an hriat a ṭul. Mizoram hmasawnna tur sum zawng zawng deuhthaw sên ralna NLUP hian thawh chhuah a nei tlem lutuk hi Congress sorkar thatchhiat vang liau liau a ni," a ti a; NLUP chu mipui sum pawt hêk a, party induhsakna hmanrua a nih thu a sawi.
Dan leh thupek kenkawh ṭhat loh vangin hnam inpumkhatna a derthâwng tih sawiin Tawnluia chuan, "Dan leh thupek kenkawh zawh loh avangin Mizoram hmar lam khaw 31-a V/C inthlan neih theih a ni ta lo hi a pawi tak zet. Democracy lungphûm, mipuiin zalen taka inthlanna an nei ve lo tur hi sorkar mawhphurhna liau liau a ni. Inthlanna buatsaih vat turin MNF chuan sorkar kan phût," a ti.
Tawnluia chuan, kum 2008-2014 chhungin hnam dang con­tractor pali hnenah Rs. 11,99,22,10,249 man hna pek a nih thu sawiin, "Mizo contractor-te pawhin an thawh ve theih reng, hnam dangte kuta pek hi ṭha kan ti lo hle," a ti a; hnam dangte hnathawh chu Mizo hnathawh aiin a ṭhat zawk loh bakah, hna pawh a muang zawk niin a sawi.
Tawnluia sawi danin, Congress sorkarin zirna lamah kalphung fel tak awm sa aṭangin inzirtirna mumal awm loin kalphung tharah Mizo mipuite an kalpui a, chuvang chuan zirlai nu leh pa leh zirlai an buai phah hle a ni.
Congress sorkara Mizorama hnianghnâr awmchhun chu School Education Director leh Governor an nih thu sawiin Tawnluia chuan a sawi a; Congress sorkar chu mipuite'n an hnâwl ve a hun tawh niin a sawi.