Leitana kut inthlak rawn chungchang chhui tura ruatin a chhui zo tawh

September 21, 2024 (Inrinni) zana Durtlang Leitana doctor pahnih leh mi dang pakhat kutthlak rawn chungchang chhui tura Mizoram sorkarin a ruat chuan a chhui zo tawh.

Mizoram sorkar chuan he thil thleng chungchang chhui tur hian magisterial inquiry a din a ni. Aizawl District Magistrate chuan September 30 khan magisterial inquiry dinna order a tichhuak a, magisterial inquiry kalpui turin Aizawl additional district magistrate Mark Lalthanliana ruat a ni tih a tarlang.

Mark Lalthanliana hi ni sarih chhunga a thil chhuina report thehlut tura tih a ni. Ruat a nih aṭangin thil thlen dan chhui hna a kalpui ṭan nghal.

Aizawl Addl. District Magistrate chuan huntiam chhungin report a peihfel hman a, October 7 khan Aizawl District Magistrate hnenah report a thehlut. Aizawl District Magistrate in nimin khan report hi Home department-ah a thehlut veleh.

Home department chuan magisterial inquiry report hi an zirchiang ang a, a ṭul angin hma an la chhunzawm dawn a ni.

He thil thleng chungchangah hian Bawngkawn Police Station-ah pawh FIR thehluh a ni a, police-te chuan thubuai ziaklutin, thil thlen dan an la chhui zui mek. Hriat theih chinah an thil chhuina report (chargesheet) court-ah an la thehlut lo.

Police Headquarters thuchhuah tarlan a nih tawh angin, September 21, 2024 zan dar 11-12 inkar khan Dr Laldinliana Sailo, Zemabawk, Dr Rinngheta Renthlei s/o Dr RL Sanghluna, Durtlang leh Lalthlamuana s/o PL Ropara, Durtlang Mel-5 te chu Durtlang Leitanah kutthlak rawn an ni.

Kutthlaktute hian mi pathumte chu an lirthei aṭangin an hnûk chhuak a, Dr Rinngheta chu leiah bawhbeh a ni a, mi dangin a lu leh taksaah an lo chhir a, a kawr pawh thler vek a ni. Dr Laldinliana Sailo leh Dr Rinngheta Renthlei te chu na takin an hliam a, Lalthlamuana erawh a hliam na lo.

Kut an tawrh avang hian Dr Laldinliana Sailo chuan Bawngkawn Police Station-ah FIR a thehlut a, police-te'n bawhzuiin, thil thlenna hmun an pan nghal a, Dr Rinngheta t-shirt thler chu Lalthlamuana hnen aṭangin lak a ni.

Mi kutthlak rawntu mi paruk - Sailianpuia Sailo (28) s/o Lalremruata Sailo (L), Lalmalsawma Zote (25) s/o Vanlalruata Zote, Mark Zairemmawia (24) s/o Lalsiamkunga, Lalvenpuia (22) s/o Rinchungnunga, Vanlalpekhlua (23) s/o H Thangzela (L) leh K Vanlaltharzela (23) s/o K Ramengmawia te chu September 23, Thawhṭanni khan police-in an man. Sailianpuia Sailo hi Venghlui a ni a, mi dang zawng chu Ramhlun North an ni.

Mi paruk zinga mi Sailianpuia Sailo chu police ṭang lai, tuna Aizawl DEF hnuaia Sairang Police Station-a thawk mek a ni a; a lakah disciplinary proceeding kalpui nghal niin, Aizawl SP chuan a suspend a ni.