Hrui hrang hrang zamfel hna thawk mek; Ban hluia hruite hlih vek an ni dawn

Aizawl Smart City Ltd. leh Power & Electricity department tangkawp hmalaknain Aizawl khawpui tlangdung kawng, Bawngkawn leh Kulikawn inkara electric hrui leh hrui hrang hrangte zamfel mek a ni a, ban hluia hruite hlih vek an ni dawn.

Aizawl Smart City Ltd. leh Power & Electricity department chuan Multi Utility Pole Project kaltlangin heng hrui hrang hrangte hi mumal zawka zam fel a nih theih nan hma an la a, hei hian kawngpui tlangdung bik chauh a huam dawn a ni. Aizawl khawpui chhunga hrui zam fel hna thawh khatna hi tun thla ni 4 khan ṭan a ni a, hei hian Zarkawt aṭanga Kulikawn inkar huamin, tun thla ni 31 hmaa zawhfel hman tum a ni.

He hmalakna bawhzui hian tun hnai khan Aizawl Smart City Ltd. CEO CC Lalchhuangkima hoin a pisaah P&E dept.-a thawkte, project-in a huam chhung local council leh Aizawl khawpui chhunga ban hmangtute an ṭhukhawm.

CC Lalchuangkima chuan ban thar hmang turte chuan, Indian Road Congress-in dan a siam angin metre 5.5 aia hniama hrui thlun tawh loh tur a nih bakah, ban hluia hrui kalte chu tun thla ni 28 hmaa ban thara an sawn loh chuan thutlukna an lo siam tawh angin hlih vek a nih tur thu sawiin, "Hei hian mimal, sorkar leh company hrang hrang, he project-in a huam chhunga hrui nei zawng zawngte a huam vek," a ti.

Aizawl Smart City Ltd. hotute chuan, an hmalakna chuan Aizawl khawpui chhunga hrui hnawk avanga mipui leh khawtlangin harsatna an tawh ṭhin chu a sutkian ngei an beisei thu leh Aizawl khawpui a lan mawi phah an beisei thu an sawi.

An hmalakna avang hian veng hrang hrangah kawlphetha tih tawp a ngaih ṭhin thu tarlangin, cable TV leh internet hmangtuten harsatna an lo tawk a nih pawhin an hriatthiamna an ngen nghal.